Ռուսաստանում ավելի հաճախ են խոսում Յանուկովիչի կառավարության հետ առճակատման մասին: Հիմնական խնդիրները կապված են գազի հետ: Բանն այն է, որ Տիմոշենկոյի օրոք ստորագրված պայմանագրով Ուկրաինան շատ բարձր գներով և մեծ քանակությամբ գազ գնելու պարտավորություններ է ստանձնել:
Այս հանգամանքը դուր չի գալիս նույնիսկ իր ծայրահեղ ռուսամետությամբ աչքի ընկնող Ուկրաինայի նախագահ Վիկտոր Յանուկովիչին: Երեկ հայտնի է դարձել, որ Ուկրաինան դիմել «Գազպրոմին» 2012 թ. 27 միլիարդ խորանարդ մետր գազ գնելու համար՝ այս տարվա 40 միլիարդի փոխարեն: Թե ինչ հետևանքներ սա կարող է ունենալ ռուս-ուկրաինական հարաբերությունների վրա՝ դժվար չէ ենթադրել: Երեկ Ռուսաստանի «Վեստի» հեռուստաալիքի մեկնաբանը զգուշացրել է, որ պայմանագրով սահմանված քանակություն չգնելու դեպքում ՌԴ-ն կարող է տուգանքներ սահմանել Ուկրաինայի համար:
Ուկրաինան վերջերս նույնիսկ հայտարարել է, որ իր քարածխի հաշվին պատրաստվում է երեք անգամ կրճատել ՌԴ-ից գնվող գազի ծավալները, քանի որ գազի գները «թալանում են» ուկրաինական բյուջեն և ժողովրդին: Այս մասին մասնավորապես հայտարարել է Ուկրաինայի վարչապետ Ազարովը:
