Նախկին բարձրաստիճան ոստիկան Գեղամ Պետրոսյանը, որը միակն էր 2008-ի մարտյան իրադարձություններից հետո, որին տասը զոհերի մահվան գործով մեղադրանք առաջադրեցին, 2019-ին ազատ արձակվեց։ Ծանր հոդվածով մեղադրվող նախկին բարձրաստիճան ոստիկանը ի սկզբանե մեղադրանքը չի ընդունել:
Հիշեցնենք, որ Գեղամ Պետրոսյանին մեղադրանք էին առաջադրել ենթասպա Ալեքսանդր Ղազարյանի ցուցմունքի հիման վրա։ Նա մեղադրվում է մարտի 1-ի զոհ Զաքար Հովհաննիսյանի սպանության մեջ։ Փաստաբան Վաղարշակ Գևորգյանը նշեց, որ ավելի ուշ փորձաքննության արդյունքները ցույց տվեցին, որ իրականում Պետրոսյանի զենքի և դիակում եղած պարկուճի տեսակները չեն համընկնում։
«Առաջին լրատվական»-ի հետ զրույցում նա նշեց, որ դիմում է ներկայացրել նախաքննական մարմին, որպեսզի Գեղամ Պետրոսյանի դեմ հարուցված քրեական գործը կարճվի, և նա արդարացվի, քանի որ ազատ արձակումից հետո որևէ քննչական գործողություն չի կատարվել։
Պաշտպան Վաղարշակ Գևորգյանը «Առաջին լրատվական»-ի հետ զրույցում նշեց․ «Միջնորդությունը, որը ներկայացրել եմ, դրական ակնկալիքներ ունեմ։ Եվ եթե ես համոզված լինեմ, որ հաստատապես մերժելու են, ես չէի դիմի։ Թող քննարկեն, տեսնենք ինչ կասեն։»,-ասաց պաշտպանը։
Անդրադառնալով խնդրին, որ Գեղամ Պետրոսյանին ազատ արձակելուց հետո երեք տարի է՝ քննչական գորոծղություն չի կատարվել, պաշտպանը նշեց, որ թեև քննչական գործողություններ չեն կատարվել, բայց ենթադրում է, որ այլ քննչական գործողություններ արել են՝ վերջնականապես համոզվելու՝ մեղադրանքը որքանո՞վ է հիմնավոր կամ որքանո՞վ է անհիմն․ «Իրեն անմիջապես չեն հարցաքննել, բայց նաև քննչական գործողություններ են արել»,-ասաց նա։
Պաշտպանը նորից շեշտեց՝ փամփուշտները չեն համընկել։ Որպես պաշտպան՝ գտնում է, որ Գեղամ Պետրոսյանն ապօրինի կալանավորված է եղել․ «Ենթադրում եմ, որ իրենք ունեցել են որոշակի տվյալներ, որ իբրև թե Գեղամ Պետրոսյանն է սպանություն կատարել, բայց իմ համոզմամբ, իրավական հիմնավորումներով Գեղամ Պետրոսյանը բացարձակ չի կատարել այդ արարքը, և չէր էլ կարող կատարել ամենամեծ ցանկության դեպքում անգամ, քանի որ Զաքար Հովհաննիսյանը մահացել է մեկ այլ օր, մեկ այլ ժամի, մեկ այլ վայրում, իսկ Գեղամ Պետրոսյանին մեկ այլ օրվա մեկ այլ վայրում, մեկ այլ ժամի կատարած լինելու մեջ են մեղադրում, այսինքն՝ անգամ օրը, ժամը, վայրը, որևէ բան չի համընկնում»։
Ի դեպ, Գեղամ Պետրոսյանը դեռ երեք տարի առաջ ազատ արձակվելուց հետո լրագրողների հետ զրույցում նշում էր, որ մեկ ամսվա ընթացքում խոստացել են մեղադրանք հանեն, փակեն գործը, բայց փաստացի երեք տարվա ընթացքում որևէ քննչական գործողություն չի կատարվել։