Ճապոնիայի այն բնակիչների թիվը, որոնք հունիսին հոսպիտալացվել են ջերմահարվածի պատճառով, կազմել Է 15 657, ինչը ռեկորդային բարձր ցուցանիշ Է այդ ամսվա համար: Հուլիսի 6-ին այդ մասին հաղորդել Է Kyodo գործակալությունը:
Ինչպես նշում Է գործակալությունը, ներկայիս թիվն ավելի քան կրկնապատիկ գերազանցել Է նախորդ հակառեկորդը, որն արձանագրվել Էր 2011 թվականի հունիսին, երբ հիվանդանոցներ Էին տեղափոխել 6 980 մարդու: Բացի դրանից, 17 հոսպիտալացվածներ մահացել են, ինչը նույնպես դարձել Է հակառեկորդ:
Նաեւ հիվանդանոց ընդունված 439 մարդ ստիպված երեք շաբաթ մնացել Է բուժհիմնարկներում բուժումն ավարտելու համար: Ճապոնիայում ամբողջ անցյալ շաբաթ դիտվել Է ռեկորդային տապ գրեթե 150 տարվա ընթացքում: Տոկիոյում օրվա միջին ջերմաստիճանը գերազանցել Է Ցելսիուսի 32 աստիճանը, իսկ երկրի որոշ տարածաշրջաններում ջերմաչափի սյունը բարձրացել Է 40 աստիճանի նշագծից վեր: Երկրում առավել շոգ եղանակի շրջանը բաժին Է ընկնում հուլիսին եւ օգոստոսին: Տեղի իշխանությունները բնակչությանը հորդորում են կրել գլխարկներ, գործածել ավելի շատ հեղուկներ եւ սահմանափակել արեւի տակ մնալու ժամանակը, հաղորդել Է ՏԱՍՍ-ը:
