Ո՞ր դեղերն են, որ շատ հաճախ ոմանց համար ծառայում են որպես թմրադեղ

Գաղտնիք չէ, որ երբ թմրամոլները թմրադեղ չեն ունենում, փորձում են դեղատներից անհամեմատ էժան դեղեր գնել և, խառնելով որոշ նյութերի հետ, թմրադեղ ստանալ:

ՀՀ առողջապահության նախարարության գլխավոր թմրաբան, գլխավոր նարկոդիսպանսերի տնօրեն Պետրոս Սեմիրճյանից հետաքրքրվեցինք, թե ներկա դրությամբ դեղատներում վաճառվո՞ւմ են դեղեր, որոնցից հնարավոր է թմրադեղ ստանալ:

Նրա խոսքերով՝ կոդեին պարունակող ցանկացած դեղից կարող են ստանալ դեզոմորֆին, ինչը և չարաշահում են: Ավելին՝ ունեն հիվանդներ, որոնք այդ դեղերը չարաշահելու արդյունքում են հայտնվել նարկոլոգիական կլինիկայում:

Խոսելով դեզոմորֆինի ազդեցությունից՝ Պետրոս Սեմիրճյանը ասաց. «Թմրամոլությունն ինքնին ծանր հիվանդություն է ցանկացած արտահայտությամբ: Եթե մենք օգտագործում ենք թմրամոլություն բառը՝ նկատի ունեք, որ արդեն կա ծանրագույն խնդիր: Իսկ դեզոմորֆինը օգտագործելու դեպքում շատ ավելի արագ է բերում ֆիզիկական վնասների: Միջազգային կազմակերպությունները միշտ շեշտում են, որ դեղերը, որոնք չարաշահվում են որոշ մարդկանց կողմից և օգտագործվում որպես թմրամիջոց, շատ կարևոր միջոց են բազում մարդկանց համար՝ իրենց ցավերը, տառապանքները մեղմելու, և վերաբերմունքը այդ դեղերի հանդեպ պետք է լինի բացասական:

Մենք ունենք երևույթ, որը ինքը անհանդուրժելի է, և երևույթի մասին պետք է խոսենք: Եթե աշխարհում 16 միլիոն թմրամոլ կա, ապա միաժամանակ կա 1 միլիարդ կամ 1.5 միլիարդ մարդ, որոնց այդ դեղերը անհրաժեշտ են կյանքի որակը բարելավելու համար: Հետևաբար՝ այդ դեղերը հիմնովին դեղատներից հանելը ճիշտ չի լինի: Բայցևայնպես, վերահսկման աշխատանքներ տարվում են: Վերահսկման ուղղությամբ աշխատանքների արդյունքում 4 դեղ մտցվեցին հսկողության տակ: Մյուս դեղերը ևս, երբ տեսնում ենք, որ խնդրահարույց են դառնում, նոր անդրադառնում ենք դրանց»,- ավելացրեց Պետրոս Սեմիրճյանը։