Թուրքական Milliyet թերթի փոխանցմամբ՝ թուրքական ընդդիմության առաջնորդ, «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուն հայտարարել է, թե 2007 թվականին երկրի նախագահ ընտրված Աբդուլլահ Գյուլի պաշտոնավարության ժամկետը կազմում է 5 տարի։
Սա անհանգստացրել է իշխող «Արդարություն ու զարգացում» կուսակցությանը (ԱԶԿ), որի խորհրդարանական խմբակցության փոխնախագահ Մուսթաֆա Էլիթաշը պարզբանում է մտցրել տվյալ հարցում.
«Նախագահի պաշտոնավարության ժամկետի շուրջ սահմանդրական ուղղման միջոցով այդ ժամկետը 7 տարվանից նվազել է մինչև 5 տարվա։ Սակայն այս ուղղումը պետք է գործի հաջորդ նախագահի համար։ Այսինքն, Գյուլը պետք է պաշտոնավարի 7 տարի (մինչև 2014 թվականը)։ Նախագահը պետության, 74 միլիոնի ներկայացուցիչն է»։
Էրիթաշը հիշեցրել է, որ Թուրքիայի խորհրդարանի պատգամավորների լիազորության ժամկետը համապատասխան սահմանադրական ուղղման միջոցով 5 տարուց նվազեցվել է 4-ի։
Հիշեցնենք, որ այս խառնաշփոթության սկիզբը դրվել է 2007 թվականի մայիսի սկզբին, երբ Գյուլը փորձում էր նախագահ ընտրվել, սակայն այդ ժամանակ դա նրան չհաջողվեց, ինչը թուրքական խորհրդարանի ցրման ու վաղաժամ ընտրությունների նշանակման պատճառ դարձավ (եթե թուրքական խորհրդարանը մեկ ամսվա ընթացքում չի կարողանում նախագահ ընտրել, ապա այն ցրվում է):
2007 թվականի մայիսի 10-ին թուրքական խորհրդարանը երկրորդ ընթերցմամբ հաստատեց Սահմանադրական ուղղումները, ըստ որոնց` նախագահն այսուհետ ընտրվելո էր ոչ թե խորհրդարանականների, այլ` ժողովրդի կողմից «5+5» տարբերակով. 5 տարի ժամկետով` ևս մեկ անգամ նույն ժամկետով վերընտրվելու հնարավորությամբ: Մինչ այդ նախագահը 4 փուլով ընտրվում էր խորհրդարանի կողմից 7 տարի ժամկետով, իսկ մեջլիսի կազմը` հանրաքվեի միջոցով 5 տարին մեկ:
Օրենսդիր ժողովի իրավասությունները տվյալ պահին 5 տարվա փոխարեն նվազեցին մեկ տարով ու կազմեցին 4 տարի: Սակայն այն ժամանակ Թուրքիայի նախագահ Ահմեթ Նեջդեթ Սեզերը վետո դրեց այդ ուղղումների վրա՝ գտնելով, որ դրա ժամանակը չէ:
Եվ ահա 2007 թվականի հուլիսի 22-ի վաղաժամ խորհրդարանական ընտրություններում ԱԶԿ-ի համոզիչ (46.7 տոկոս) հաղթանակից ու օգոստոսի 28-ին՝ երրորդ փուլում, թուրքական խորհրդարանի կողմից Գյուլի նախագահ ընտրվելուց (հնարավոր 448 քվեից 339 քվե) հետո` հոկտեմբերի 21-ին Թուրքիայում տեղի ունեցավ սահմանադրական ուղղումների հանրաքվե, որի արդյունքներով էլ հաստատվեցին վերոնշյալ սահմանադրական ուղղումները:
