2022 թվականի աշխարհի առաջնության ընտրական փուլի շրջանակներում սեպտեմբերի սկզբին Հայաստանի ազգային հավաքականը երեք հանդիպում կանցկացնի։ Սեպտեմբերի 2-ին մերոնք Սկոպիեյում կմրցեն Հյուսիսային Մակեդոնիայի հետ, իսկ երեք օր անց կհյուրընկալվեն աշխարհի քառակի չեմպիոն Գերմանիային։ Սեպտեմբերի 8-ին էլ Վազգեն Սարգսյանի անվան «Հանրապետական» մարզադաշտում Հայաստանի հավաքականը կխաղա Լիխտենշտեյնի հետ։ Հիշեցնենք, որ երրորդ տուրից հետ Հայաստանը 9 միավորով գլխավորում է J ենթախումբը։ Առաջիկա հանդիպումներում նույնիսկ 6 միավոր վաստակելու դեպքում Խոակին Կապառոսի թիմը լուրջ նախադրյալ կստեղծի աշխարհի առաջնության եզրափակիչ փուլում հայտնվելու։ Մեր հավաքականն արդեն իսկ ապացուցել է, որ կարող է դրական արդյունքի հասնել ցանկացած մրցակցի դեմ խաղում։ Երկրպագուն լիահույս է, որ Հայաստանի հավաքականի հաղթարշավը կշարունակվի նաև սեպտեմբերին։ Այո, հաղթելու համար ունենք բավարար ռեսուրս, բայց․․․։
Մասնավորապես Հյուսիսային Մակեդոնիայի դեմ մրցավեճում մեր գլխավոր թիմը կներկայանա լուրջ կորուստներով։ Որակազրկման պատճառով Սկոպիեյում չեն խաղա կենտրոնական պաշտպան Վարազդատ Հարոյանը, ինչպես նաև եզրային կիսապաշտպաններ Խորեն Բայրամյանն ու Տիգրան Բարսեղյանը։ Վերջին երեք հանդիպումներում այս ֆուտբոլիստները ցուցադրելով բարձրակարգ ֆուտբոլ դարձել են գոլի հեղինակ էապես նպաստելով հաղթանակներին։ Նշված ֆուտբոլիստների բացակայությանը զուգահեռ ծագել է ևս մեկ խնդիրը, որն ավելի քան մտահոգիչ է։ Խոսքը հիմնական դարպասապահ Դավիթ Յուրչենյոյի վնասվածքն է։ Մեր հիմնական դարպասապահը ամենայն հավանականությամբ բաց կթողնի առաջիկա հանդիպումները։ Յուրչենկոն բաց է թողել «Ալաշկերտի» վերջին հանդիպումները և դժվար թե մինչև սեպտեմբերի 2-ը վերականգնվի և ֆունկցիոնալ առումով պատրաստ լինի կարևորագույն հանդիպումներին։ Ո՞վ կպաշտպանի Հայաստանի հավաքականի դարպասն առաջիկա հանդիպումներին։ Նախօրեին հայտնի դարձավ, որ ՀՖՖ-ն քայլեր է ձեռնարկում Երևանի «Փյունիկի» ներկայացուցիչ Ստանիսլավ Բուչնևին հրավիրելու համար։ Այս դարպասապահը հայկական արմատներ ունի և իրավական առումով կարող է խաղալ մեր ազգային թիմում։ «Ազգությամբ հայ է իմ պապիկի մայրը, և ես չէի մտածում, որ հնարավոր է ստանալ Հայաստանի անձնագիր ու իրավունք խաղալու Հայաստանի ազգային հավաքականում։ Այդ թեմայով խոսակցություն ունեցա «Փյունիկի» տեխնիկական տնօրեն Արտուշ Մկրտչյանի հետ, և նա ասաց, որ դա բավարար հիմք է Հայաստանի հավաքականում խաղալու համար։ Եթե ինչ-որ բանով կարող եմ օգնել թիմին, միշտ պատրաստ եմ: Յուրաքանչյուր մարդու համար հպարտություն է խաղալ ազգային հավաքականի կազմում: Իհարկե, ես չեմ կարող ասել, որ ինձ լիարժեք հայ եմ զգում, բայց հայկական արյուն ունեմ և դրանով հպարտանում եմ»,- Vnews-ին տված հարցազրույցում ասել է Բուչնևը։
Վերջինիս հրավիրելու համար անհրաժեշտ է լուծել անձնագրային և փաստաթղթային հարցերը, որոնք ժամանակ են պահանջում։ Այս պահին դեռևս պարզ չէ մինչև Հյուսիսային Մակեդոնիայի դեմ խաղը ՀՖՖ-ն կկարողանա կարգավորել Բուչնևի փաստաթղթային խնդիրները, թե ոչ։ Այսինքն, ներկայում մեր ազգային թիմն ունի հրատապ խնդիր։ Այս պահին առաջիկա հանդիպումներում մեր ազգային թիմի դարպասը պաշտպանելու միակ թեկնածուն «Ուրարտուի» ներկայացուցիչ Անատոլի Այվազովն է։ Վերջինս բազմիցս է հրավիրվել Հայաստանի ազգային սակայն որևէ պաշտոնական հանդիպման չի մասնակցել։ Ցավոք, բացի Այվազովից Հայաստանի առաջնությունում ելույթ ունեցող որևէ այլ հայ դարպասապահ չկա, որի որակները թույլ են տալիս խաղալ ազգային թիմում։ «Ուրարտու»-ում է խաղում նաև Արսեն Բեգլարյանը, որը բազիցս խաղացել է Հայաստանի ազգային հավաքականում աչքի ընկնելով բավական թույլ խաղով։
Խոակին Կապառոսը Հայաստանի հավաքականի կազմը կհրապարակի վաղը։ Հնարավոր է, որ հենց վաղը որոշակի հստակցություն լինի ծագած խնդիրների լուծման հարցում։
