Եվրամիության արտաքին քաղաքականության պատասխանատու Կայա Կալլասը մեկնաբանել է ԱՄՆ-ի և Իրանի միջև ձեռք բերված համաձայնությունը՝ որակելով այն որպես հնարավոր բեկումնային քայլ։ Նա ընդգծել է, որ հրադադարն ու Հորմուզի նեղուցի վերաբացումը կարող են անհրաժեշտ հիմքեր ստեղծել Իրանի միջուկային ծրագրի և այլ առանցքային խնդիրների շուրջ խորքային բանակցությունների համար, ինչպես նաև մեղմել համաշխարհային էներգետիկ ճգնաժամը։
Կալլասը տեղեկացրել է, որ վերջին օրերին քննարկումներ է ունեցել իր իրանցի և պարսից ծոցի երկրների գործընկերների հետ։ Նրա խոսքով՝ Եվրամիությունը պատրաստ է ակտիվ մասնակցություն ունենալ գործընթացի հաջորդ փուլերին՝ կիրառելով իր տնտեսական լծակները, միջուկային ոլորտի փորձագիտական ներուժը և ծոցի երկրների հետ ունեցած երկարամյա կապերը՝ կայուն կարգավորման հասնելու համար։
Այսօր ԵՄ արտգործնախարարները կքննարկեն միության ներգրավվածության ձևաչափը՝ համաձայնության իրականացման գործում իրենց ավանդն ունենալու նպատակով։
