ՀՀ պետական եկամուտների կոմիտեն երեկ տեղեկացրեց, որ Ֆիզիկական անձանց կողմից օտարերկրյա պետությունում գրանցված անձնական օգտագործման տրանսպորտային միջոցների ժամանակավոր ներմուծումը Հայաստանի Հանրապետության տարածք թույլատրվում է ոչ ավելի, քան 1 տարի ժամկետով:
Հիշեցնենք, որ 2020 թվականի մայիսի 28-ից ուժի մեջ է մտել ԵՏՀ խորհրդի թիվ 47 որոշումը, որի արդյունքում անձնական օգտագործման տրանսպորտային միջոցների ժամանակավոր ներմուծման ժամկետները երկարաձգվել են մինչև այս տարվա սեպտեմբերի 30-ը։ ՊԵԿ-ն զգուշացնում է՝ Ֆիզիկական անձանց համար բացասական ֆինանսական հետևանքները կանխելու նպատակով՝ օտարերկրյա պետությունում գրանցված տրանսպորտային միջոցները անհրաժեշտ է մինչև 2021թ. սեպտեմբերի 30-ը արտահանել Հայաստանի Հանրապետության տարածքից։ Այդ ժամկետում տրանսպորտային միջոցները չարտահանելու դեպքում ֆիզիկական անձինք կվճարեն տուգանքներ՝ խախտման օրվա դրությամբ այդ տրանսպորտային միջոցների համար «ներմուծում` ազատ շրջանառության համար» մաքսային ռեժիմով նախատեսված մաքսային վճարների մեծության 50 տոկոսի չափով:
Ավտոներկրող Դավիթ Գասպարյանն «Առաջին լրատվական»-ի հետ զրույցում ասաց, որ նման վերջնաժամկետներ սահմանելուց առաջ նախ պայմաններ պետք է ստեղծվեն այդ մեքենաները Հայաստանի տարածից հանելու համար։ Մասնավորապես ճանապարհները բացվեն։ «Եթե մարդը ավտոմեքենա է բերել, որ տանի ՌԴ, իսկ դեպի ՌԴ ցամաքային ճանապարհը փակ է, ինչպե՞ս պետք է այդ ավտոմեքենան արտահանի։ Իսկ եթե իրենք պայմանները կստեղծեն, ճանապարհները կբացեն, ապա ոչ մի խնդիր չկա։ Թող պայմանները ստեղծվեն ու սեպտեմբերի 30-ից սկսեն տուգանել։ Իսկ եթե պայմաններ չեն ստեղծվել, մարդը օբյեկտիվ խոչընդոտներով պայմանավորված չի կարող այդ մեքենան երկրից հանել, կարծում եմ աբսուրդ է ներկորղներին տուգանել»,-ասաց Գասպարյանը։
Մեր զրուցակցի խոսքով՝ Հայաստանում այդքան շատ չեն նման մեքենաները։ Նախկինում Ռուսաստանի Դաշնություն, Ղազախստան տանում էին այն մեքենաները, որոնք որ հաշվառված էին Հայաստանում՝ մաքսազերծվել ու պետհամարանիշ էին ստացել։ Իսկ չմաքսազերծվածները, որոնք ժամանակին ներկրվել են արտահանելու նպատակով, շատ չեն, բայց դա, մեր զրուցակցի խոսքով, ոչինչ չի նշանակում.«Եթե անգամ մեկ նման մեքենա կա, ապա պայմանները պետք է արդար լինեն սեփականատիրոջ համար։ Նրան պետք է հնարավորություն տրվի, պայմաններ ստեղծվեն նրա համար։ Հիմա ես ինչքան գիտեմ միայն Վրաստանի հետ է ճանապարհը բաց, բայց Վրաստանից մնացած ԵԱՏՄ երկրներ ճանապարհը փակ է, ՌԴ ճանապարհը փակ է։ Մարդը ո՞նց արտահանի իր մեքենան»,-ասաց Գասպարյանը։
Մեր զրուցակցի խոսքով՝ ավտոներկրման ոլորտում հիմա շատ քիչ մարդ է մնացել։ Մի քանի ներկրողներ կան, ովքեր հիմնականում ԱՄՆ-ից, Կանադայից, Եվրոպայից 3-5 տարեկան մեքենաներ են ձեռք բերում.«Բայց դա 2018-2019 թվականի բումը չէ և դժվար էլ այդ վիճակը երբևէ լինի։ Այս գործի մեջ մտած մարդիկ շատ մեծ վնասներ կրեցին և Կորոնավիրուսի պատճառով, և պատերազմի պատճառով։ Մարդիկ իրենց բնակարանները գրավ էին դրել՝ ակնկալիքով, որ 2020 թվականին մեքենա կվաճառեն ու համ իրենց վարկը փակեն, համ իրենց ընտանիքը կպահեն, բայց նրանք մեծ կորուստներ կրեցին։ Կորոնավիրուսը սկսվեց, սահմանները փակվեցին, առևտուր չեղավ, մարդիկ ստիպված էժան ծախեցին իրեց ապրանքը, որ գոնե վարկերից պրծնեն ու մեծ վնասներ կրեցին։ Կարծում եմ, որ այս ոլորտը այլևս երբեք Հայաստանում նախկինի պես չի լինի»,-եզրափակեց Դավիթ Գասպարյանը։
Լուսանկարը՝ Armeniasputnik-ի
