Այո, երեկ վարչապետ Նիկոլ Փաշինյանն առանձնազրույց է ունեցել ՌԴ նախագահի հետ, որի ժամանակ քննարկվել է ստեղծված իրավիճակը, դրանից հետո որոշում է կայացվել և այս պահի դրությամբ փաստաթղթերը տրվել են ՀԱՊԿ-ին: Այս մասին «Առաջին լրատվական»-ի հետ զրույցում նշեց ԱԺ փոխխոսնակ Ալեն Սիմոնյանը:
«Վարչապետի պաշտոնակատարը դիմել է պաշտոնապես ՌԴ նախագահին հայ-ռուսական պայմանագրի շրջանակներում աջակցություն տալ ՀՀ-ին, այդ թվում նաև զինվորական աջակցության մասին է խոսքը»,-ասաց նա:
Դիտարկմանը, որ ՀԱՊԿ-ի այս կրավորական կեցվածքը նորություն չէ, ժամանակին, երբ Տավուշում լարվածություն էր լինում, կամ խախտումներ են եղել, ՀԱՊԿ-ը ինտերտ հայտարարություններով է հանդես եկել և երբեք իր պարտավորությունները հավուր պատշաճի չի կատարել, արդյոք Հայաստանը չպետք է այլընտրանքներ փնտրի, Ալեն Սիմոնյանն ասաց. «Նախ, ՀԱՊԿ-ի մասին խոսելիս, հաճախ մեր հանրությունը նկատի է ունեցել այն իրադարձությունները, որոնք տեղի են ունենում ԼՂ սահմանի շուրջ: Այսինքն սպասումներ են եղել մի տարածքի հետ կապված, որը ՀԱՊԿ-ում ներգրավված չէ: Ինչ վերաբերում է մնացած դեպքերին, մենք հիմա սպասում ենք ՀԱՊԿ-ի արձագանքին: Հիմա մեկնաբանություն անել, թե առաջ ինչ է եղել և դրա վրա հիմնվելը, ես դրան պատչաստ չեմ»,-ասաց նա՝ հավելելով, որ ՀԱՊԿ-ի արձագանքն այս դեպքում բավարար է համարում:
