ՀՀ վարչապետ Նիկոլ Փաշինյանը, ապրիլի 14-ին Ազգային ժողովում կառավարության հետ հարցուպատասխանի ընթացքում պատասխանելով անկախ պատգամավոր Տիգրան Ուրիխանյանի հարցին, վերահաստատեց իր այն պնդումը, որ Մարտի 1-ի գործն, ամենայն մանրամասնությամբ, բացահայտված է: «Եթե մենք ուզենայինք դատաստան, մենք կանեինք դատաստան, բայց մենք ուզում ենք արդարադատություն: Մենք հավատում ենք անկախ դատական համակարգին: 2008թ. մարտի 1-ի գործն, իմ կարծիքով, բացահայտված է: Ի վերջո, այդ նյութերը կան, դրանք չեն այրվելու, դրանք մի պահի ունենալու են այնպիսի կարգավիճակ, որ կարող են ուղղակի հրապարակվել, և դուք կտեսնեք, որ Մարտի 1-ի գործն, ամենայն մանրամասնությամբ, բացահայտված է»,- ասաց Փաշինյանը:
Մարտի 1-ի զոհերից Տիգրան Խաչատրյանի մայրը՝ Ալլա Հովհաննիսյանը, «Առաջին լրատվական»-ի հետ զրույցում անդրադառնալով վարչապետի հայտարարությանը, նկատեց, որ Մարտի 1-ի գործի բացահայտումը բավարար չէ, անհրաժեշտ է, որ դրա համար պատասխանատվություն կրողներ լինեն, որպեսզի հետագայում նման հանցագործությունները չկրկնվեն։ «Երբ ասում ենք արդարադատություն, ապա հասկանում ենք բացահայտում և պատասխանատվություն։ Եթե հիմա վարչապետն ասում է, որ Մարտի 1-ը բացահայտված է, ապա, այո՛, բոլորիս համար էլ Մարտի 1-ը դե ֆակտո բացահայտված է հենց 2008 թվականի մարտի 1-ի օրը։ Մարտի 1-ի բացահայտումը եղել է 13 տարի առաջ։ Բոլորն առաջին օրվանից գիտեին, թե ինչ է եղել, ով է իրականացրել Մարտի 1-ը, ով է տվել կրակելու հրաման։ Մենք այդ ամենը առաջին օրվանից էլ գիտեինք, մեզ համար պարզ էր, բայց մենք արդարադատություն ենք պահանջում։ Մենք պահանջում ենք, որ դե ֆակտո բացահայտումը ստանա դե յուրե բացահայտման տեսք, ու մեղավորները ենթարկվեն պատասխանատվության։ Մեր ընկալմամբ՝ դա է արդարադատությունը։ Մեզ բացահայտում և պատասխանատվություն է պետք»,- ասաց Հովհաննիսյանը՝ ցավ հայտնելով, որ իշխանությունը 3 տարվա մեջ չկարողացավ այնպես անել, որ այդ արդարադատությունը կյանքի կոչվեր։ «Բայց դեռ ուշ չէ, պետք է ավարտին հասցնել նախատեսված բարեփոխումները, ստեղծել իրապես անկախ դատական համակարգ ու վերջապես Մարտի 1-ի գործով արդարադատության հասնել։ Թե չէ ի՞նչ է նշանակում՝ փաստերը կան, վկաները կան, բայց չկա դատավարություն ու մեղավոր»,- ասաց տիկին Ալլան՝ ստեղծված իրավիճակում մեծապես տեսնելով իշխանության մեղավորությունը։
Իրավապաշտպան Նինա Կարապետյանցը «Առաջին լրատվական»-ի հետ զրույցում ասաց, որ արդեն դադարել է տրամաբանություն տեսնել գործող իշխանության գործողություններում։ «Մարտի 1-ից անցել է 13 տարի, բոլորը՝ ականատեսները, վկաները, մասնակիցները շատ լավ հիշում են, թե ինչ է կատարվել, նրանց հիշողությունները շատ թարմ են, գործի նյութերին ծանոթանալու անհրաժեշտություն չկա, կարդալու իմաստ չկա։ Մարտի 1-ի գործի բացահայտման իմաստն այն էր, որ ստեղծվեր այնպիսի նախադեպ, որպեսզի որևէ մեկ այլ եկող իշխանության մտքով անգամ չանցներ, որ հնարավոր է իրականացնել Մարտի 1 և մարսել դա, որովհետև անգամ սպանված քաղաքացիների հարազատներն են հասկանում, որ իրենց հարազատներին վերադարձնել չեն կարող։ Իրենց պայքարի ամբողջ իմաստը արդարության հասնելն էր՝ ի դեմս մեղավորներին պատասխանատվության ենթարկելը։ Դա կարող էր դիտարկվել որպես կանխարգելիչ գործողություն, որպեսզի Մարտի 1-ը չկրկնվեր»,- ասաց Կարապետյանցը՝ հավելելով, որ այս բոլոր առումներով ունենք ձախողում, տապալում։ «Հիմա մեզ համոզում են, որ գործը միտումնավոր չեն տապալել, ու կարող ենք գործի նյութերին ծանոթանալ, բայց, վստահաբար, գործի նյութերին ծանոթանալով՝ կոնկրետ ես ոչ մի նոր բան չեմ կարող իմանալ, դրան բավարար չափով ծանոթ եմ։ Խոսքը, կրկնում եմ, արդարադատության և պատասխանատվության մասին է»,- ընդգծեց իրավապաշտպանը՝ հավելելով, որ վստահ է, որ ներկայումս քննվող քրեական գործը ևս տապալվելու է, և մենք անգամ սպանությունների մասով բացահայտում չենք ունենա։ «Ես վստահ եմ, որ այս գործը չի բացահայտվի, և հնարավոր չի լինի որևէ կազմակերպչի, հրահանգ տվողի ենթարկել պատասխանատվության»,- եզրափակեց Կարապետյանցը։
Լուսանկարը՝ Photolure-ի
