Հայաստանի հավաքականի ավագ Հենրիխ Մխիթարյանը չի հեռանա «Ռոմայից»։ Ինչպես հայտնում է romanews պարբերականը` կողմերը համաձայնության են եկել նոր պայմանագրի հարցում:Այն պետք է կնքվեր դեռևս այս տարi, երբ հայ ֆուտբոլիստը թիմի կազմում անցկացրել էր նախապես պայմանավորված 25 հանդիպումները: Նույն աղբյուրի համաձայն Մխիթարյանի գործակալ Մինո Ռայոլան պահանջել է կնքել երկու տարվա պայմանագիր, առանց աշխատավարձի կրճատման, ինչին համաձայն չեն եղել ակումբում:
Հիշեցնենք, որ Հայաստանի ֆուտբոլի ազգային հավաքականի ավագի պայմանագիրը «Ռոմայի» հետ ավարտվում է ամռանը։ Այն չերկարաձգելու դեպքում Մխիթարյանը կունենա ազատ ֆուտբոլիստի կարգավիճակ և առանց ֆինանսական փոխհատուցման կկարողանա տեղափոխվել այլ ակումբ։ Ավելի վաղ խոսվում էր, որ Թուրինի «Յուվենտուսում» սպասում են Մխիթարյանին։ Այս մասին գրել էր թուրինյան ակումբի վերաբերյալ վերջին նորությունները լուսաբանող Juvelive.it պարբերականը։ Մասնավորապես նշվում էր, որ շնորհիվ Մխիթարյանի գործակալ Մինո Ռայոլայի՝ գործարքը, ամենայն հավանականությամբ, կկայանա։ «Այսօր «Յուվենտուսը» փնտրում է Մխիթարյանի պես կայացած և ունիվերսալ ֆուտբոլիստի։ Հավանականությունը մեծ է, որ Պաուլու Դիբալան կհեռանա։ Վերջին շրջանում նրա խաղը ուղղակի չի ստացվում, և արգենտինացի ֆուտբոլիստը մտադիր է կարիերան շարունակել այլ ակումբում։ Մխիթարյանն այն ֆուտբոլիստներից է, ով կարող է լրացնել Դիբալայի բացը»,- գրել էր Juvelive.it -ը։
Նշվում էր նաև, որ Մխիթարյանի գործակալը պահանջում է առնվազն տարեկան 4 միլիոն եվրո աշխատավարձ, որը «Յուվենտուսի» համար խնդիր չէ։ Մեկ այլ աղբյուրի համաձայն Ռայոլան հստակ պայման էր ներկայացրել «Ռոմայի» ղեկավարությանը՝ կապված պայմանագրի երկարացման հետ։ Հաշվի առնելով վերջին շրջանում Մխիթարյանի արդյունավետ ելույթները՝ Ռայոլան պահանջել էր Մխիթարյանի աշխատավարձի բարձրացում։ Ըստ իտալական լրատվամիջոցների Հայաստանի հավաքականի ավագը «Ռոմայում» ստանում է տարեկան 3.5 միլիոն եվրո աշխատավարձ։ Անգլիայի Պրեմիեր լիգայում Մխիթարյանը ստանում էր անհամեմատ ավելի բարձր աշխատավարձ։ Տեղափոխվելով Իտալիա՝ որոշում կայացրեց խաղալ համեստ վարձատրությամբ՝ հանուն կարիերայի աճի։ Կարծում ենք, սակայն, նման ելույթից հետո մեր կիսապաշտպանը արժանի է ավելի բարձր վարձատրության։ Ինչևէ, «Ռոմայի» հետ պայմանագրի երկարաձգման շուրջ համաձայնության գալու տեղեկությունը ստիպում է ենթադրել, որ Հռոմի թիմը այնուամենայնիվ որոշել է կատարել Մխիթարյանի գործակալի պահանջները։ «Ռոմայի» այս որոշումը միանգամայն հասկանալի է։
Ա սերիայի լավագույն կիսապաշտպաններից մեկին՝ այն էլ առանց ֆինանսական փոխհատուցման կորցնելը ուղղակի անմտություն կլիներ։ Կարծում ենք պարզ է, որ «Յուվենտուսի» հետաքրքրությունը Մխիթարյանի նկատմամբ փոխել է պայմանագրի երկարաձգման պայմանները։ Մասնավորապես, Հայաստանի ազգային հավաքականի ավագը հնարավորություն էր ստացել հայտնվելու բոլորովին այլ հարթությունում։ Մխիթարյանի արդյունավետության գործակիցը այսօր լավագույններից է Եվրոպայում։