Միացյալ Նահանգներն իրանական միջուկային ծրագրի շուրջը Ռուսաստանի և Չինաստանի հետ համատեղ աշխատելու հույս ունի, չնայած լուրջ տարաձայնություններին, որոնք կարող են Վաշինգտոնի մոտ գոյություն ունենալ Մոսկվայի և Պեկինի հետ այլ հարցերի շուրջը: Փետրվարի 18-ին կայացած ճեպազրույցում այդ մասին լրագրողներին հայտարարել է Պետդեպարտամենտի ներկայացուցիչը։
Նրա խոսքով՝ անցյալում Ռուսաստանը և Չինաստանը իրանական միջուկային ծրագրի շուրջը Գործողությունների համատեղ համապարփակ պլանի (ԳՀՀՊ) շրջանակում բանակցությունների ժամանակ խաղացել են «արդյունավետ, կառուցողական դեր, քանի որ նրանք շահագրգռված չէին, որ Իրանը միջուկային զենք ձեռք բերի, և նրանք շահագրգռված չէին, որ տարածաշրջանում հակամարտություն լինի»: «Կարելի է ակնկալել, որ այդ նույն շահերը մնում են, և որ, չնայած մյուս լուրջ տարաձայություններին, որ մենք նրանց հետ կարող ենք ունենալ այլ հարցերի շուրջը, մենք կարող ենք աշխատել այդ (հարցի) վրա»,- մեջբերում է նրա խոսքը Պետդեպարտամենտի մամուլի ծառայությունը: Ավելի վաղ Մեծ Բրիտանիայի, Գերմանիայի, Ֆրանսիայի և ԱՄՆ-ի արտաքին քաղաքական գերատեսչությունների ղեկավարների բանակցությունների արդյունքների վերաբերյալ տարածված հայտարարության մեջ ասված է, որ այդ չորս երկրները շահագրգված են Ռուսաստանի և Չինաստանի մասնակցությամբ Իրանի միջուկային ծրագրի վերաբերյալ կոնսուլտացիաների հացում: Ըստ որում նրանք հայտնել են, որ ձգտում են թույլ չտալու Իրանի կողմից միջուկային զենքի մշակումներ: Բացի դրանից, «եվրաեռյակը» և ԱՄՆ-ը հայտնել են «Իրանի կողմից ԳՀՀՊ-ի շրջանակում իր հանձնառությունների լիովին կատարմանը վերադառնալու ընդհանուր նպատակի կողմնակցությունը: Գործողությունների համատեղ համապարփակ պլանը 2015 թվականին Իրանի հետ ստորագրել են ՄԱԿ-ի Անվտանգության խորհրդի հինգ անդամները և Գերմանիան Թեհրանի միջուկային մշակումների շուրջը ծագած ճգնաժամի հաղթահարման նպատակով։
