Պատգամավոր Գևորգ Պետրոսյանը հայտարարել է ԲՀԿ-ն թողնելու մասին, թեև չի թողնում ԲՀԿ միջոցով ստացած մանդատը: Նա հայտարարել է, որ լինելու է անկախ պատգամավոր: Հետաքրքիրն, իհարկե, ԲՀԿ-ն թողնելու մասին նրա բացատրությունն է: Գևորգ Պետրոսյանը հայտարարել է, որ իրեն չի գոհացնում ներկայիս իրավիճակում կտրուկ գնահատականների և գործողությունների հանդեպ կուսակցական առանձին գործընկերների անհանգստությունը: Թեև Գևորգ Պետրոսյանը չի տալիս անուններ, սակայն կասկած չկա, որ առանձին գործընկերները Գագիկ Ծառուկյանն է, ուղիղ, թե անուղղակի, ըստ էության չունի նշանակություն: Բանն այն է, որ ԲՀԿ նախագահը, առաջնորդը, հովանավորը, ըստ էության կուսակցության սեփականատերը Գագիկ Ծառուկյանն է:
Հետևաբար, եթե Գևորգ Պետրոսյանի գործունեությունը խնդիր չունի նրա մոտ, առանձին գործընկերները Պետրոսյանի համար խնդիր լինել չեն կարող ընդհանրապես: Համենայնդեպս, նա իր գործունեությամբ ցույց է տվել, որ այդպիսի առանձին դրվագներով կաշկանդվող գործիչ չէ առհասարակ: Ըստ այդմ, խնդիրը հենց Ծառուկյանի հետ է, և Գևորգ Պետրոսյանն առանց անուն տալու, ըստ էության արձանագրում է այդ մասին կամ ավելին, գուցե պարզապես մատնացույց է անում Ծառուկյանին՝ որ նա դեմ է կտրուկ և կոշտ գնահատականներին ու գործողություններին: Այդպիսով, Գևորգ Պետրոսյանը ոչ միայն պարզապես դուրս է գալիս ԲՀԿ խմբակցությունից, այլ դուրս է գալիս ակնարկելով, որ Գագիկ Ծառուկյանը չի պաշտպանում այն կոշտ և համարձակ մոտեցումները, որ դրսևորում է ինքը՝ Պետրոսյանը: Եվ եթե դիտարկենք այդ գնահատականը կամ արձանագրումը Վազգեն Մանուկյանի մոտեցումների հետ, որոնց, թերևս, առավել համահունչ է Գևորգ Պետրոսյանի պատկերացումը, ապա ստացվում է, որ Գևորգ Պետրոսյանն արձանագրում է Գագիկ Ծառուկյանի և, այսպես ասած, «17»-ի հակասությունը: Ամբողջ հարցն այն է, թե արդյո՞ք դա Պետրոսյանի այսպես ասած անձնական նախաձեռնությունն է, թե՞ նա պարզապես սկսում է խաղալ այլ թիմում: Եվ արդյո՞ք այս դեպքում ԲՀԿ-ից սկսում է Ռոբերտ Քոչարյանի թիմի արտահոսքի, այսպես ասած, երկրորդ ալիքը: Առաջինը, ինչպես հիշում են թերևս շատերը, 2015 թվականի փետրվարի 12-ից հետո էր: Ընդ որում, հիշարժան է նաև այն, որ այն ժամանակ էլ հեռացողները կուսակցության, ըստ էության արմատական, կոշտ գծի և հռետորաբանության կրողներն էին: Գևորգ Պետրոսյանը վերջի՞նն էր, թե՞ առաջինը երկրորդ ալիքում:
