Աֆրիկյան միությանն առընթեր Հիվանդությունների հսկողության եւ կանխարգելման աֆրիկյան կենտրոնը (CDC) արտակարգ հակազդման փորձագետներից բաղկացած խումբ կուղարկի Գվինեա, որտեղ ավելի վաղ գրանցվել է Էբոլա տենդի բռնկում: Այդ մասին հաղորդել է կազմակերպության մամուլի ծառայությունը: Փետրվարի 14-ին Գվինեայի առողջապահության նախարարությունը հայտարարել է երկրի հարավ-արեւմուտքում գտնվող Գուեկի ենթապրեֆեկտուրայում Էբոլա տենդի համաճարակի սկսվելու մասին: Իշխանությունների տվյալներով՝ միջոցները ձեռնարկվել են այն բանից հետո, երբ երկրում գրանցվել է Էբոլայից մահվան չորս դեպք:
«Աֆրիկյան միության հանձնաժողովը տեղեկացվել է բռնկման մասին եւ պատրաստ է համակողմանի աջակցություն ցուցաբերել Աֆրոմիության բոլոր հաստատություններին: Հիվանդությունների հսկողության եւ կանխարգելման աֆրիկյան կենտրոնը (CDC) կշարունակի աշխատել Գվինեայի Հանրապետության կառավարության հետ եւ պատրաստվել առաջիկա 48 ժամում ստեղծելու արտակարգ հակազդման փորձագետներից բաղկացած խումբ»,- ասվում է հայտարարության մեջ, որը զետեղվել է կենտրոնի կայքում: Նշվում Է, որ CDC-ն Առողջապահության արեւմտաաֆրիկյան կազմակերպության հետ համատեղ փորձագետների արտակարգ խորհրդակցություն կգումարի միջոցառումները Գվինեայում եւ հարեւան երկրներում ավելի լավ համակարգելու համար: ԱՀԿ-ի տվյալներով՝ Գվինեայում 2016 թվականից ի վեր առաջին անգամ լաբորատոր գրանցվել է Էբոլայով վարակման երեք դեպք: Նախնական հետաքննության համաձայն, հիվանդության առաջին զոհը դարձել է բուժքույրը, որը մահացել է հունվարի 28-ին: Նրան հուղարկավորելուց հետո վեց մարդու մոտ հայտնաբերվել են տենդի ախտանշաններ: Նրանցից երկուսը մահացել է, եւս չորսը՝ հոսպիտալացվել:
Էբոլա վիրուսով պայմանավորված հիվանդությունը սուր վիրուսային վարակ է, որն ախտահարում է մարդկանց եւ կենդանիների առանձին տեսակների: Էբոլայի համաճարակն Արեւմտյան Աֆրիկայում բռնկել է 2015 թվականին եւ հիմնականում ընդգրկել երեք երկիր՝ Գվինեան, Սիեռա-Լեոնեն եւ Լիբերիան: ԱՀԿ-ի տվյալներով՝ վերջին խոշոր համաճարակի ժամանակ Էբոլայով վարակվել է 28.6 հազար մարդ, մահացել է ավելի քան 11.3 հազար հոգի, հաղորդել է ՌԻԱ Նովոստին:
