«Վրացական երազանք» կուսակցությունը հունվարի 16-ին համագումար է անցկացնելու, որին կմասնակցի շուրջ 400 պատվիրակ: Նախատեսվում է, որ իշխող քաղաքական ուժի նախագահի պաշտոնում պետք է հաստատվի խորհրդարանի նախկին խոսնակ Իրակլի Կոբախիձեն:
«Վրացական երազանքի» գլխավոր քարտուղար Կախա Կալաձեն ճեպազրույցում հայտարարել է, որ նախագահի պաշտոնում կառաջադրվի Կոբախիձեն: Քաղաքական խորհուրդը հաստատել է նաև նոր քաղխորհրդի 21 անդամների թեկնածուների ցուցակը:
Ավելի վաղ կուսակցության հիմնադիր և նախագահ Բիձինա Իվանիշվիլին դիմելով Վրաստանի ժողովրդին, ասել է, որ ընդմիշտ հեռանում է քաղաքականությունից: Կալաձեն Իվանիշվիլիի հեռանալը նոր մարտահրավեր է անվանել, որն ավելի մեծ պատասխանատվություն է պահանջում:
