Վրաստանը կորոնավիրուսի դեմ պատվաստանյութի առաջին խմբաքանակը կստանա փետրվարին՝ COVAX հարթակի միջոցով, լրագրողներին ասել է առողջապահության նախարար Եկատերինա Տիկարաձեն:
«Մենք համագործակցում ենք COVAX հարթակի հետ, որը մեր երկրից պարտադիր պահանջում է պատվաստումների պլան ներկայացնել: Մենք արդեն պատվաստումների մեր պլանը ներկայացրել ենք COVAX-ին, ինչպես նաև ԱՀԿ-ն: Ընթանում են ինտենսիվ բանակցություններ, որոնք ենթադրում են, որ փետրվարին Վրաստանը COVAX-ից կստանա պատվաստանյութի առաջին դեղաչափերը»,- ասել է Տիկարաձեն:
COVAX-ը կորոնավիրուսի դեմ պատվաստանյութի մշակման, արտադրության և տարածման միջազգային նախաձեռնություն է: Արտադրական կարողությունների ստեղծման ու կենտրոնացված գնումների իրականացման աջակցության մեխանիզմում ներգրավված է 190 երկիր և տնտեսություն: Ըստ ծրագրի նախատեսվում է, որ 2021 թվականի ավարտին COVAX-ի միջոցով պետք է արտադրվի և հավասարաչափ բաշխվի 2 միլիարդ դեղաչափ պատվաստանյութ: