Ամերիկացի պրոֆեսիոնալ բռնցքամարտիկ Դերրիլ Քեննինգեմը հայտարարել է, որ կհամաձայնի մենամարտել անգամ իր հարազատ տատիկի հետ, եթե իրեն վճարեն 1.5 մլն դոլար: Այս մասին հաղորդում է Fightnews.com-ը: Քեննինգեմի խոսքերով՝ մարտից հետո ինքը կրկին մեծ հարգանքով կվերաբերվի իր տատիկին:
Բռնցքամարտիկը տատիկի հետ մարտի մասին խոսել է՝ մեկնաբանելով աշխարհի նախկին չեմպիոն Քենի Պավլիկի հետ մենամարտելուց իր հրաժարվելը: Պավլիկը, նախքան ռումին Լուչան Բուտեի հետ չեմպիոնական գոտու համար մարտը, պլանավորել էր մենամարտել Քեննինգեմի հետ, սակայն, երբ իմացել է, որ իրեն ընդամենը 1.5 մլն դոլար հոնորար են տալու, երկու մարտից էլ հրաժարվել է:
Քեննինգեմը համարում է, որ իրականում Պավլիկը հրաժարվել է ոչ թե հոնորարի համար, այլ վախեցել է ռինգ դուրս գալ իր դեմ: Բռնցքամարտիկի խոսքերով՝ Պավլիկի թիմը պարզել է, որ ինքը լուրջ վտանգ է ներկայացնում աշխարհի նախկին չեմպիոնի համար:
Պավլիկ-Քեննինգեմ մարտը պետք է կայանար օգոստոսի 6-ին Յանգսթաունում՝ Պավլիկի հարազատ քաղաքում: Հաղթանակի դեպքում Պավլիկը պետք է հանդիպեր միջին քաշային կարգում IBF տարբերակով աշխարհի չեմպիոն Բուտեի հետ: