CA Technologies ընկերության մասնագետները հայտարարել են, որ հայտնվել է վտանգավոր ծրագիր, որը պահպանում է Android օպերացիոն համակարգով գործող սմարթֆոններով կատարված հեռախոսազանգերի ձայնագրությունը: Իրենց կայքում ընկերության մասնագետներն ասել են, որ հատուկ հավելվածը ձայնագրում է խոսակցությունը և պահպանում է այն սմարթֆոնի SIM քարտի հիշողության մեջ AMR ֆորմատի ֆայլի տեսքով:
Հետազոտողները չեն բացառում, որ հնարավոր է՝ անկախ հեռախոսի սեփականատիրոջ կամքից, հեռախոսազրույցի ձայնագրությունը հեռախոսից ուղարկվի հատուկ սերվերների վրա, որտեղ այն կընկնի չարագործների ձեռքը և կարող է օգտագործվել սմարթֆոնների տերերի դեմ: Ըստ նախնական տեղեկությունների՝ վտանգավոր հավելվածն ունի Android System Messenger անվանումը, որից հետևում է, որ հավելվածի հեղինակները, հնարավոր է, այն ներկայացրել են որպես համակարգային հավելված: Չի նշվում, թե ինչ միջոցներով է տարածվում այս հավելվածը:
Android Market-ում կան բազմաթիվ հավելվածներ, որոնք ապահովում են հեռախոսազրույցների ձայնագրություն, սակայն դրանք պահվում են բացառապես հեռախոսի հիշողության մեջ:
