Հայաստանի հավաքականի և «Կրասնոդարի» հարձակման գծի առաջատար Յուրա Մովսիսյանն այսօր դարձավ 24 տարեկան:
«Առաջին լրատվականը» շնորհավորում է տաղանդավոր ֆուտբոլիստին և մաղթում նրան նոր բարձունքների նվաճում:
Յուրա Մովսիսյանը 2001-2002 թվականին սկսել է ֆուտբոլ խաղալ «Փասադենա» ֆուտբոլային քոլեջում, որտեղ սովորել է 1 տարի։ Առաջին պրոֆեսիոնալ պայմանագիրը կնքել է 2006 թվականին «Կանզաս Սիթի» ակումբի հետ, որի կազմում անցկացրել է 28 խաղ և խփել 5 գնդակ։ 2007 թվականին Յուրան պայմանագիր է կնքել «Ռեալ Սոլթ-Լեյք» ակումբի հետ, որի կազմում անցկացրել է 2 սեզոն և 53 խաղում խփել 15 գնդակ։ Այդ ընթացքում Յուրա Մովսիսյանը նաև դարձել է MLS-ի չեմպիոն։
Տաղանդավոր խաղացողի նկատմամբ սկսում է հետաքրքրություն ցուցաբերել Դանիայի բարձրագույն դիվիզիոնը ներկայացնող «Ռանդերս» ակումբը, որտեղ հանդես էր գալիս Հայաստանի հավաքականի անդամ Ռոբերտ Արզումանյանը: Մրցաշարային աղյուսակում վտանգավոր գոտում «ամրապնդված» ակումբը 2009 թվականին պայմանագիր է ստորագրում Յուրա Մովսիսյանի հետ, որի խփած 7 գոլերը առաջնության մնացած 13 խաղերում օգնեցին «Ռանդերս»-ին պահպանել տեղը Դանիայի բարձրագույն առաջնությունում:
2010 թվականի օգոստոսի 11-ին Մովսիսյանը իր առաջին հանդիպումը անցկացրեց Հայաստանի ֆուտբոլի ազգային հավաքականի կազմում։ «Հրազդան» մարզադաշտում կայացած Հայաստան-Իրան հանդիպումն ավարտվեց Իրանի ֆուտբոլիստների հաղթանակով՝ 3-1 հաշվով, իսկ Յուրան խաղադաշտում անցկացրեց ընդամենը 15 րոպե, ինչը պայմանավորված էր թեթև վնասվածքով:
2010 թ. սեպտեմբերի 3-ին Յուրա Մովսիսյանը իր առաջին գնդակն է խփում Հայաստանի հավաքականի կազմում՝ բացելով հաշիվը Մակեդոնիայի հետ արտագնա խաղում, որն ավարտվեց ոչ-ոքի՝ 2-2:
Մովսիսյանը մեկական գոլի հեղինակ դարձավ նաև Սլովակիայի և Անդորրայի հավաքականների հետ խաղում՝ օգնելով Հայաստանի ֆուտբոլի ազգային հավաքականին հաղթանակ տոնել այդ խաղերում։
Հայաստանի հավաքականում անցկացրած 4 պաշտոնական խաղերում հեղինակած 3 գնդակներից հետո Յուրա Մովսիսյանով սկսում են հետաքրքրվել մի շարք եվրոպական թիմեր, որոնց շարքում էին իսպանական «Էսպանյոլ»-ը, Կիևի «Դինամո»-ն, մոսկովյան «Լոկոմոտիվ»-ը և Կազանի «Ռուբին»-ը։ Սակայն ձմեռային տրանսֆերային պատուհանի փակվելուց մի քանի օր առաջ հայտնի է դառնում, որ Մովսիսյանը պայմանագիր է կնքել Ռուսաստանի Պրեմիեր լիգայի նորեկ «Կրասնոդար»-ի հետ։
Տվյալները՝ ըստ Վիքիպեդիայի:
