Ադրբեջանական 1news.az-ի փոխանցմամբ՝ Ադրբեջանի անկախության 20-ամյակին նվիրված The Business Year» – The Business Year – Azerbaijan 2011 պարբերականի հատուկ համարին տված հարցազրույցի ժամանակ Ադրբեջանի արտգործնախարար Էլմար Մամեդյարովն անդրադարձ է կատարել ղարաբաղյան հակամարտության ու Հայաստանի հետ հարաբերությունների կարգավորմանը.
«Արդեն 20 տարի է, ինչ Լեռնային Ղարաբաղն ու նրան հարակից 7 շրջանները գտնվում են հայկական «օկուպացման» տակ։ ԵԱՀԿ Մինսկի խմբի միջնորդությամբ տարվող բանակցություններն ընթանում են 17 տարի։ Անձամբ ես 2010 թվականին իմ ռուս գործընկեր Լավրովի միջնորդությամբ մի շարք հանդիպումներ եմ անցկացրել իմ հայ գործընկերոջ հետ։
Դրա հետ մեկտեղ, մենք մշտական շփումների մեջ ենք ԵԱՀԿ Մինսկի խմբի համանախագահների հետ։ Այդպիսով, Ադրբեջանին ու Հայաստանին հաջողվել է հարթել մի շարք տարաձայնություններ։ Այնուամենայնիվ, կողմերի միջև դեռևս առկա են մի շարք կարևոր տարրեր, որոնց պետք է համաձայնեցնել։
Մենք բավական վստահ ենք, որ խաղաղությունը կարող է երկարատև լինել, եթե այն հենվի երկու համայնքների խաղաղ գոյակցության վրա։ Ադրբեջանի տարածքային ամբողջականության շրջանակներում մենք պատրաստ ենք Լեռնային Ղարաբաղին շնորհել ինքնավարություն։ Անկախ ամեն ինչից՝ մենք հավատում ենք հակամարտության խաղաղ կարգավորմանը։
Քանի որ մենք որևէ հարաբերություններ չունենք Հայաստանի հետ, դա բացասականորեն է ազդում նաև տարածաշրջանային համագործակցության վրա՝ Հայաստանին դուրս թողնելով տարածաշրջանային նախագծերից։ Ադրբեջանի պաշտոնական դիրքորոշումը հետևյալն է. Հայաստանը «պետք է իր օկուպացիոն» ուժերը դուրս բերի Ադրբեջանի տարածքից, ինչից հետո կբացվի տնտեսական համագործակցության ու փոխհարաբերությունների դուռը»։
