Բրազիլիայի մինի ֆուտբոլի առաջնության հերթական տուրի հանդիպումից առաջ` նախավարժանքի ժամանակ, մահացել է ADMF ակումբի 38-ամյա խաղացող Մեսինյոն:
«Մենք սովորականի նման պատրաստվում էինք հանդիպմանը: Նախավարժանքի ժամանակ Մեսինյոն իրեն վատ զգաց և ընկավ հատակին: Մենք նրան անմիջապես հիվանդանոց տեղափոխեցինք, սակայն բժիշկները չհասցրեցին փրկել նրա կյանքը. սիրտն արդեն կանգ էր առել»,- ակումբի մարզչի խոսքերն է մեջբերում Rádio Gazeta AM-ը:
Ռոշա Էմերսոն Ռոդրիգեսը (Մեսինյո) ծնվել է 1973 թ. օգոստոսի 30-ին: Հայրենիքում խաղացել է UPF, «Ատլետիկո Բլումենալ», ASBF, «Կառլոս Բարբոզա» ակումբներում, այդուհետ տեղափոխվել է Ռուսաստան, որտեղ խաղացել է Մոսկվայի «Սպարտակ»-ում և «Դինամո»-ում: Հետո կրկին վերադարձել է հայրենիք ու ելույթ ունեցել ADMF-ի կազմում:
