Թուրքական Ihlas լրատվական գործակալության ներկայացմամբ՝ Թուրքիայի արտգործնախարար Ահմեդ Դավութօղլուն մեկնելու է Նորվեգիա, որտեղ նախորդ շաբաթ տեղի ունեցած ահաբեկչության հետևանքով սպանվել է 76 մարդ։
Այդ կապակցությամբ Դավութօղլուն այցելել է Անկարայում գտնվող Նորվեգիայի դեսպանատուն։ Այնտեղ նա մոտ կես ժամ հանդիպում է ունեցել դեսպան Լանդսվերկի հետ և քննարկել ահաբեկչության խնդիրը։
Դեսպանատնից հեռանալիս Դավութօղլուն պատասխանել է լրագրողների հարցերին՝ նշելով, որ եվրոպական երկրներն իզուր էին այդքան վախենում իսլամից. «Սրանից առաջ ահաբեկչությունը շարունակ շաղկապում էին իսլամի հետ։ Սակայն ահաբեկչությունը մարդկային հանցագործություն է, այն չի ճանաչում կրոնական, լեզվական կամ էթնիկ պատկանելություն։ Անհրաժեշտ է, որ ահաբեկչության դեմ պայքարեն բոլոր ազգերն ու կրոնները»։
Դավութօղլուն նաև հայտնել է, որ պլանավորել է մոտ ժամանակներս այցելել Նորվեգիա։
Հիշեցնենք, որ թուրքական Taraf թերթը հայտնել էր, թե նորվեգացի ահաբեկիչ Բրեյվիկի պատվիրատուն իսրայելական «Մոսսադն» է։
