Վրացական GHN լրատվական գործակալության փոխանցմամբ՝ ճապոնական «Մայնիտի» թերթին տված հարցազրույցի ժամանակ Հարավային Օսիայի նախագահ Էդուարդ Կոկոյտին հայտարարել է, որ Ռուսաստանը մտադիր չէ անեքսիայի ենթարկել Հարավային Օսիային և նրա հետ կարելի է ձևավորել դաշնակցային հարաբերություններ.
«Մենք ստեղծում ենք անկախ պետություն, որի ժողովուրդը մշտապես հիշելու է այն անգնահատելի օգնությունը, որը մեզ ցուցաբերել է Ռուսաստանը։ Անկասկած, մենք ձգտելու ենք նրա հետ ձևավորել դաշնակցային պետություն։ Ռուսաստանը մեզ համար մշտապես եղել, կա և կլինի մեր հիմնական ռազմավարական գործընկերն ու դաշնակիցը։
Ռուսաստանին օտար տարածքներն անհրաժեշտ չեն, նա ոչ մի մտադրություն չունի Հարավային Օսիան անեքսիայի ենթարկելու համար։ Մինչև 2008 թվականի օգոստոսյան իրադարձությունները շատ այժմեական էր Օսիայի հարավային ու հյուսիսային հատվածների միավորման հարցը։ Սակայն իր չմտածված ագրեսիվ քաղաքականությամբ պարոն Սաակաշվիլին ամեն ինչ արեց, որպեսզի Հարավային Օսիան դառնա անկախ պետություն»։
Հիշեցնենք, որ օրեր առաջ էլ Կոկոյտին բացառել էր Վրաստանի հետ որևէ համադաշնության կամ դաշնության ձևավորումը. «Մենք չենք կարող Վրաստանի հետ կազմել որևէ համադաշնություն ու դաշնություն։ Եթե մենք դրան վերադառնանք, ապա մեր ապագա սերունդը կմատնվի նոր տանջանքների ու փորձությունների։ Այդ դեպքում այն ժամանակ հանուն ինչի՞ էինք մենք պայքարում և ռիսկի ենթարկում այդքան մարդու կյանք»։
