«Ազատություն» ռադիոկայանի փոխանցմամբ՝ Երևան կատարած այցի ավարտին Եվրախորհրդի խորհրդարանական վեհաժողովում (ԵԽԽՎ) Հայաստանի հարցով համազեկուցող Աքսել Ֆիշերը ողջունել է իշխող կոալիցիայի և արտախորհրդարանական Հայ ազգային կոնգրեսի միջև ծավալվող երկխոսությունը:
ԵԽԽՎ-ի պաշտոնական կայքում տեղադրված հաղորդագրության համաձայն՝ Ֆիշերը հույս է հայտնել, որ զուգահեռաբար կառուցողական երկխոսություն կկայանա նաև կոալիցիայի և խորհրդարանական ընդդիմության միջև:
«Ես շատ բավարարված եմ երկխոսության մեկնարկով, որը վաղուց Վեհաժողովի ցանկությունն էր և որը էական է Հայաստանում քաղաքական միջավայրի կարգավորման առումով: Կոչ եմ անում բոլոր կուսակցություններին՝ առավելագույն ճկունություն և բարեխղճություն դրսևորել այն հաջողությամբ պսակելու համար», – հայտարարել է ԵԽԽՎ-ի համազեկուցողը:
Ֆիշերը նաև ընդգծել է առաջիկա խորհրդարանական ընտրությունների կարևորությունը երկրի ժողովրդավարական զարգացման տեսանկյունից՝ մասնավորապես, ասելով. – «Նոր Ընտրական օրենսգիրքը ամուր հիմք է տրամադրում ժողովրդավարական ընտրությունների համար, սակայն այն պետք է կիրառվի բարեխղճորեն, ոգուն և տառին համապատասխան»:
«Հանրությունը պետք է լիակատար վստահություն ունենա ընտրական գործընթացի և դրա արդյունքների նկատմամբ: Հետևաբար, կոչ եմ անում բոլոր կուսակցություններին՝ ապահովել ընտրությունների ժողովրդավարական բնույթը և ձեռնպահ մնալ որևէ գործողություններից կամ հայտարարություններից, որոնք կարող են սասանել այդ վստահությունը», – հայտարարել է համազեկուցողը:
Հուլիսի 19-21-ը այցի ընթացքում Ֆիշերը քննարկել է նաև 2008 թվականի մարտիմեկյան իրադարձությունների հետևանքով զոհված 10 անձանց մահվան հանգամանքների վերսկսված քննության, ինչպես նաև Վեհաժողովի կողմից առաջարկված, հատկապես՝ ոստիկանությանը և դատական համակարգին առնչվող բարեփոխումների ընթացքը, ասված է ԵԽԽՎ-ի հաղորդագրությունում:
