Ապրիլի 14-ին տեղի ունեցավ Արցախի նախագահի ընտրությունների երկրորդ փուլը, և ընտրության արդյունքների համաձայն՝ նախագահ ընտրվեց Արայիկ Հարությունյանը։ Ի՞նչ կարող եք ասել այդ կապակցությամբ, գո՞հ եք ընտրության արդյունքներից․ «Առաջին լրատվական»-ի հարցին Արցախի բնակիչներից մեկը պատասխանեց․ «Իհարկե գոհ ենք, որովհետև ընտրություններն անցան թափանցիկ, արդար, և իրոք արժանին ընտրվեց։ Մենք վստահում ենք նրան, ակնկալիքներ ունենք, որ նա իր խոստումի տերը կլինի ու ժողովրդի կյանքը կբարելավի։ Եվ հիմա էլ կարող եմ ասել, որ շնորհավորում եմ նրան ընտրություններում հաղթելու համար, ցանկանում եմ նրան աշխատանքում հաջողություն»։
«Շատ գոհ եմ, ջախջախեց։ Դե, իրականությունը դա է։ Բոլոր թեկնածուների մեջ մենակ նա է, որ կարող է ղեկավարել երկիրը։ Ես էդպես եմ կարծում, երևի ժողովուրդը՝ նույնպես։ Եթե ուրիշ ավելի լավը լիներ, ապա ժողովուրդն էդ ուրիշին կընտրեր»,- ասաց մեկ այլ արցախցի։
Իսկ Արցախի մի բնակչուհի էլ ասաց․ «Ընտրության արդյունքներից շատ գոհ ենք, թափանցիկ է անցել ու ժողովրդի թեկնածուն էլ ընտրվել է նախագահ։ Սպասում ենք, որ նա արդարացնի իրեն ու իրականացնի իր կողմից ներկայացված ծրագրերը։ Նա իր ծրագրի մեջ ներառել էր հետևյալ կարևոր խնդիրները՝ անվճար կրթություն, անվճար առողջապահություն, բնակարան ցանկացած ընտանիքի համար։ Կարծում եմ՝ դրանք այն առաջնահերթություններն են, որոնք անհրաժեշտ են ցանկացած արցախցու։ Հուսով ենք, որ կկատարվեն մեր երազանքները»։
Արցախի մեկ այլ բնակչուհի էլ ասաց, որ ընտրել է Սամվել Բաբայանին ու գտնում է, որ Սամվել Բաբայանն արժանի է, քանի որ նա է ազատագրել այս քաղաքը։
«Ճիշտն ասած՝ ես չեմ մասնակցել՝ հիվանդ եմ եղել։ Դե, որ հիվանդ էի, ո՞նց ասեմ՝ գո՞հ եմ եղել, թե՞ դժգոհ։ Ինձ համար միևնույն է, թե ով է ընտրվել։ Ով էլ ընտրվել է, նա կլինի մեր բոլորի նախագահը։ Ինձ համար տարբերություն չկար, թե ով կլիներ»,- ասաց մեկ այլ արցախցի։
Մանրամասները՝ տեսանյութում։
