Երեկ մենք տեղեկացրել էինք, որ 1991-95 թթ. Սերբական Կրաինա ինքնահռչակ հանրապետության ղեկավար Գորան Հաջիչը ձերբակալվել է Սերբիայում և արդեն առաջիկա օրերին կհանձնվի Հաագայի միջազգային քրեական դատարանին։ Նա մեղադրվում է 90-ականներին բալկանյան պատերազմի ժամանակ մարդկության դեմ գործած հանցագործությունների մեջ:
Սերբական մամուլը որոշ տեղեկություններ է հաղորդել ձերբակալության մասին: Պարզվում է՝ Հաջիչին մատնել է Ամեդեո Մոդիլյանին: Այսինքն՝ Հաջիչի գտնվելու վայրի մասին հայտնի է դարձել այն ժամանակ, երբ վերջինս փորձել է վաճառել Ամեդեո Մոդիլյանիի գողացված կտավը: Այս մասին հայտարարել է սերբական ոստիկանության քննիչ Վլադիմիր Վուկևիչը: Նրա խոսքերով՝ Հաջիչը գումարի կարիք է ունեցել, իսկ նկարը նրան բաժին է հասել Խորվաթիայում պատերազմի ժամանակ: Այս մասին հաղորդում է BBC-ն:
Երեկ Սերբիայի դատարանը որոշում է կայացրել Հաագայի դատարանին նրան արտահանձնելու վերաբերյալ: Դա տեղի կունենա առաջիկա օրերի ընթացքում, եթե Հաջիչի փաստաբանները չբողոքարկեն առաջին ատյանի դատարանի որոշումը: