Forbes-ի գնահատականը ՀՀ տնտեսության վիճակի վերաբերյալ քաղաքական պատվեր չէ: Այսօր ասուլիսի ժամանակ նման կարծիք հայտնեց տնտեսագետ Թաթուլ Մանասերյանը: Նրա խոսքով՝ դա ընդամենը բանիմացության խնդիր է, միաժամանակ նաև վիրավորական է վերջին տեղում հայտնվելը:
«Օբյեկտիվ ինֆորմացիա չկա: Եթե մի կողմից շատ գունազարդում են, մի կողմից՝ սևացնում, մարդիկ շվարում են ու նայում օտար աղբյուրներին: Մենք պետք է մեր աղբյուրներն ունենանք»,- ասաց Թ.Մանասերյանը՝ փաստելով, որ հետընթաց իսկապես արձանագրվել է՝ անցյալ տարի օգոստոսին գյուղատնտեսությունը 23%-ի հետընթաց արձանագրեց, արդյունաբերությունը չի զարգացել, և այլն:
Ըստ նրա՝ կառավարությունը պետք է հստակ ձևակերպի, թե ինչ խնդիրներ են, որ լուծված չեն, ինչ խնդիրներ են, որ համաշխարհային տնտեսական ճգնաժամի հետ կապ չունեն և մեր տեղական ճգնաժամի արդյունք են: Ազգային վիճակագրական ծառայությունը թվեր է նկարում. մարտին գյուղատնտեսությունում 26 % աճ է եղել, ապրիլին՝ 43 %, բայց չկա մեկնաբանություն՝ թե ինչի՞ հաշվին, հատկապես, որ արտագաղթի ֆոնի վրա պահանջարկը պակասում է:
ԱԺ հանրապետական պատգամավոր Մանվել Բադեյանի գնահատականներն ավելի սուր էին. «Լրատվական բեսպրեդել է, Forbes-ը պայքարի լկտի միջոց է այս կամ այն թիրախ երկրի դեմ»:
Առանց նշելու դրդապատճառները՝ Մ.Բադեյանը համոզվածություն հայտնեց, որ «այդ տեսակ ռեյտինգային գործակալությունների գնահատակններին պետք չէ լուրջ վերաբերվել», որովհետև իրական դրդապատճառները խոր, օբյեկտիվ վերլուծության հետ կապ չունեն. «Սենսացիայի հետևից են ընկնում»:
