Грузия Online-ի փոխանցմամբ՝ հուլիսի 18-21-ը ակնկալվում է Ժնևյան բանակցությունների համանախագահների՝ ՄԱԿ-ի, ԵԱՀԿ-ի և ԵՄ-ի ներկայացուցիչների այցը Թբիլիսի։ Այս մասին այսօր հայտարարել է Վրաստանի փոխարտգործնախարար Նինո Կալանդաձեն։
Վերջինիս խոսքերով՝ Ժնևյան բանակցային ձևաչափի համանախագահները տեղում կծանոթանան իրավիճակին, ինչը շատ կարևոր է հաջորդ փուլի անցկացման համար.
«Վրացական կողմը նրանց կիրազեկի օկուպացված տարածքներում ստեղծված իրավիճակի մասին և նրանց ուշադրությունը կհրավիրի վրացական տարածքում ռուսական հատուկ ծառայությունների կողմից պլանավորված ու իրականացված ահաբեկչությունների վրա»։
Ժնևյան բանակցային գործընթացի համանախագահները հուլիսի 19-ին կայցելեն Ցխինվալ, իսկ հուլիսի 20-ին՝ Աբխազիա։ Ժնևյան բանակցությունների հաջորդ փուլը տեղի է ունենալու հոկտեմբերի 4-ին։
Հիշեցնենք, որ 2008 թվականի հոկտեմբերից սկսած՝ ժնևյան հանդիպումներին մասնակցում են Վրաստանի և Ռուսաստանի (ներառյալ Աբխազիան և Հարավային Օսիան), ԱՄՆ-ի, ՄԱԿ-ի, ԵԱՀԿ-ի ու ԵՄ-ի ներկայացուցիչները։ Դրանցում քննարկվում են Աբխազիայի և Հարավային Օսիայի, փախստականների վերադարձի, անվտանգության երաշխիքների և այլ հարցեր։
Վերջին շրջանում վրացական կողմը շարունակ սպառնում է դուրս գալ ժնևյան բանակցային ձևաչափից՝ հայտարարելով, որ քանի դեռ Ռուսաստանը շարունակում է Վրաստանում ահաբեկչություններ նախապատրաստել ու կազմակերպել, անիմաստ է նրա հետ բանակցային սեղանի շուրջը նստելը։
