Ինչպես հայտնում է Мост-Одесса լրատվական ծառայությունը, Օդեսայում՝ «Ոսկե ափ» կոչվող լողափում բացվել է գրադարան: Բաց երկնքի տակ գտնվող գրադարանից կարող են անվճար օգտվել բոլոր նրանք, ովքեր հանգստանում են լողափում: Նախագծի հեղինակներն են «Առաջ» հասարակական շարժման ակտիվիստները:
Հեղինակների խոսքերով՝ «Ոսկե ափի» գրադարանում կա մոտավորապես 400 գիրք, որոնց մի մասը օտար լեզվով է: Միևնույն ժամանակ գրքերը կարելի է վերցնել ոչ միայն լողափում հանգստանալիս, այլ նաև տանել տուն՝ հետագայում վերադարձնելու պայմանով կամ կարդացած գրքով այն փոխարինելով:
Օդեսայում արդեն գործում են մի քանի լողափնյա գրադարաններ: Դրանք բացվել են 2010 թ.: Այս նախագծի հեղինակները մտադիր են նմանատիպ գրադարան բացել նաև հասարակական տրանսպորտում: «Նախագիծը ցանկանում ենք իրականացնել աշնանը, քանի որ հիմա շոգ է, և մարդիկ հասարակական տրանսպորտում գիրք չեն կարդա»,- նշել է զրուցակիցը գործակալությանը տված հարցազրույցի ժամանակ:
