Facebook-ի հիմնադիր Մարկ Ցուկերբերգը կարող է մասնակցել Ուկրաինայի Արմատական կուսակցության առաջնորդ Օլեգ Լյաշկոյի նախընտրական քարոզարշավի ֆինանսավորմանը: Այս մասին հաղորդել է Ուկրաինայի նախագահի թեկնածուի շրջապատում աղբյուրը՝ փոխանցում է RIA Novosti-ն:
«Լյաշկոն համացանցի ազգայնական տրամադրություններով օգտատերերի շրջանում բավականին առաջ է անցել Օլեգ Տյագնիբոկից և Դմիտրի Յարոշից»,- ասել է գործակալության զրուցակիցը՝ ավելացնելով, որ այդ կապակցությամբ բանակցություններ են ընթանում Facebook-ի մոնիթորինգային բաժնի ղեկավարի հետ:
Աղբյուրի խոսքով՝ ամերիկացի գործարարը հուսով է աջակցություն ստանալ Ուկրաինայում իր ծրագրերը իրականացնելու համար:
Գերագույն ռադայի որևէ խմբակցության չպատկանող պատգամավոր Լյաշկոն փետրվարի վերջին հայտարարել է Ուկրաինայի նախագահական ընտրություններին իր թեկնածությունը առաջադրելու մասին: Նա, մասնավորապես, «քաղբանտարկյալների» ազատ արձակման օրինագծի հեղինակն է, որում ներառված ցուցակում կա 23 անուն, այդ թվում նաև՝ այսպես կոչված, վասիլկովյան ահաբեկիչները, որոնց Կիևյան-Սվյատոշինյան դատարանը վեց տարվա ազատազրկման է դատապարտել: Դրանից բացի՝ ցուցակում ներառված են նաև Դմիտրի Պավլիչենկոն և նրա որդին՝ Սերգեյը, ով մեղավոր է ճանաչվել 2011թ. դատավորի սպանության մեջ:
Օլեգ Տյագնիբոկը «Սվոբոդա» ազգայնական կուսակցության առաջնորդն է, որը Ուկրաինայում իշխանությունների փոփոխությունից հետո ներառված է իշխող կոալիցիայի մեջ: Դմիտրի Յարոշը, ով նույնպես նախագահի թեկնածու է, գլխավորում է արմատական ազգայնական «Աջ սեկտոր» կազմակերպությունը, որը կապված է «Սվոբոդա» կուսակցության հետ:
