Մարդու իրավունքների եվրոպական դատարանը, որ գտնվում է ֆրանսիական Ստրասբուրգ քաղաքում, ընդունել է լեհ սպաների հարազատների հայցը, որով նրանք պատասխանատվության են կանչում Ռուսաստանին՝ իրենց հարազատներին 1940 թ. գարնանը Կատինում, ինչպես նաև Խարկովում և Տվերում գնդակահարելու համար: Այս մասին հաղորդում է գերմանական Deutsche Welle-ն:
«Յանովեցն ընդդեմ Ռուսաստանի» գործում հայցվոր կողմը ներկայացված է Լեհաստանի 15 քաղաքացիներով, որոնք 1940 թ. մայիս-հունիսին գնդակահարված 12 լեհ սպաների հարազատներն են: Նրանք մեղադրում են Ռուսաստանի իշխանություններին այն բանում, որ վերջիններս չեն իրականացրել այս հանցագործության բոլոր հանգամանքների պատշաճ քննություն:
Դատարանի հայտարարության մեջ ասվում է, որ «ռուսաստանյան իշխանությունները չեն կարողացել անցկացնել հայցվորների հարազատների մահվան հանգամանքների համապատասխան և օբյեկտիվ քննություն»: Հիմա դատարանը պետք է որոշի, թե արդյոք Ռուսաստանի իշխանությունները մեղավո՞ր են Եվրոպական կոնվենցիայի երկու հոդվածների խախտման մեջ՝ կյանքի իրավունքի և խոշտանգումների արգելման ու անմարդկային և արժանապատվությունը նվաստացնող վերաբերմունքի համար: