«Վիտալի Բալասանյանն իր անձնական կարծիքն է արտահայտել։ Նա պետական պաշտոնյա չէ և խոսում է որպես անհատ քաղաքական գործիչ»,- «Առաջին լրատվական»-ի հետ զրույցում նման տեսակետ հայտնեց Արցախի նախագահ Բակո Սահակյանի աշխատակազմի ղեկավարի տեղակալ Դավիթ Բաբայանը՝ անդրադառնալով Անվտանգության խորհրդի նախկին քարտուղար Վիտալի Բալասանյանի գրասենյակի այն հայտարարությանը, թե Լեռնային Ղարաբաղի հիմնախնդրի կարգավորման հարցում Փաշինյանի մոտեցումը սպասարկում է Ադրբեջանի ազգային և պետական շահերը։
Դավիթ Բաբայանն ընդգծեց. «Առհասարակ համոզված ենք, որ չի կարող այնպես լինել, որ Հայաստանի իշխանությունները հակաարցախյան քայլեր անեն, որովհետև սա կլինի ոչ թե Արցախի դեմ քայլեր, սա կլինի հայոց պետականության գոյության դեմ ուղղված քայլեր։ Չեմ կարծում, թե կա որևէ մեկը, ով այդ քայլին կգնա։ Դա պարզապես անհնարին է ու անթույլատրելի»։
Ինչ վերաբերում է արցախյան բանակցությունների շուրջ ընթացող վերջին օրերի հակաքարոզչությանը և մեր այն հարցին՝ արդյոք Ստեփանակերտն ունի՞ բանակցությունների հետ կապված մտահոգություններ, Դավիթ Բաբայանը պատասխանեց. «Մենք տեսնում ենք, որ բանակցություններում Ադրբեջանը շարունակում է պնդել իր դիրքորոշումը, տեսնում ենք, որ որևէ փոփոխություն՝ կապված Ադրբեջանի պահվածքի հետ, տեղի չի ունենում, հետևաբար որևէ զարգացում, այլ գործընթացներ չենք տեսնում, որովհետև դրանք պարզապես չկան»։
Այն դիտարկմանը, թե հատկապես շահարկվում է ադրբեջանական համայնքի հետ կապված իշխող ուժի պատգամավոր Հովհաննես Իգիթյանի հայտարարությունը, Բաբայանը նշեց. «Մենք պետք է հստակ տարանջատենք համայնք կոչեցյալը ընդհանրապես բանակցային գործընթացից։ Քաղաքական, դիվանագիտական, բանակցությունների առումով չկա այնպիսի հասկացություն, ինչպիսին է ադրբեջանական համայնքը։ Ինչ-որ մարդկանց խումբ է, նույնիսկ ոչ թե կազմակերպություն, որն օգտվում է պետական կերակրամանից, ու որին Ադրբեջանն անընդհատ փորձում է խցկել բանակցային գործընթացի մեջ, անընդհատ շահարկել։ Այդ համայնք կոչեցյալը չի կարող դիտարկվել որպես ինչ-որ քաղաքական ուժ կամ միավոր։ Եթե Ադրբեջանը փորձում է նրան բերել բանակցային սեղան, այստեղ երկու տարբերակ կա. մեկը, որ ադրբեջանական համայնքին ընդգրկում է իրենց պատվիրակության կազմի մեջ. դա իր գործն է: Բայց եթե նույնիսկ նրանք հանդիսանան Ադրբեջանի պատվիրակության անդամ՝ ինչ-որ կարգավիճակ ունենան, առավել ևս՝ հավասար կարգավիճակ Արցախի Հանրապետության հետ, դա պարզապես անհնարին է. դա պետական կազմավորում չէ։ Եթե մենք Արցախը նույնացնենք այդ համայնքի հետ, դա կլինի սարսափելի հարված Արցախի պետականությանը»։
