Ապրիլի 21-ին Մինսկում Բելառուսի նախագահ Ալեքսանդր Լուկաշենկոն և Հայաստանի արտգործնախարար Էդվարդ Նալբանդյանը քննարկել են Մաքսային միության (ՄՄ) ընդլայման ու հետխորհրդային եվրասիական ինտեգրացիայի հետագա հեռանկարները՝ հայտնում է ИА REGNUM-ը:
Հանդիպման ընթացքում Լուկաշենկոն ՀՀ ԱԳՆ ղեկավարի ուշադրությունը հրավիրել է 3 հիմնական հարցերի՝ միջազգային հիմնախնդրին, հայ-բելառուսական երկկողմ հարաբերություններին, Ռուսաստան-Բելառուս-Ղազախստան ինտեգրացիոն միավորմանը և Հայաստանի միանալու հեռանկարներին: Մասնավորապես, քննարկվել է Մաքսային միությանը և Միասնական տնտեսական տարածքին (ՄՏՏ) Հայաստանի լիիրավ անդամակցության հեռանկարը այն պայմաններում, երբ «ինտեգրացիոն եռյակի» ղեկավարները պատրաստվում են ապրիլի 29-ին Մինսկում տեղի ունենալիք Եվրասիական տնտեսական գերագույն խորհրդի նիստին քննարկել Եվրասիական միության ստեղծման մասին համաձայնագիրը:
Հայաստանը կատարում է ՄՄ-ին և ՄՏՏ-ին անդամակցության «ճանապարհային քարտեզը», և ինչպես սպասվում է, խորհրդի ապրիլի 29-ի նիստում Հայաստանի, Ռուսաստանի, Ղազախստանի և Բելառուսի նախագահները կքննարկեն պաշտոնական Երևանի կողմից միջոցառումների տվյալ ծրագրի իրականացման արդյունքները, ինչպես նաև կորոշեն ՄՄ-ին անդամակցելու վերաբերյալ համաձայնագրի՝ Հայաստանի ստորագրման ժամկետները:
«Քանի որ դուք պարզապես փորձված մարդ չեք, դուք ստիպված եք լինում զբաղվել այս խնդիրներով, մեզ համար շատ կարևոր է այս կապակցությամբ կարծիքների փոխանակումը, այդ թվում՝ Միասնական տնտեսական տարածքի վերաբերյալ հարցերի շուրջ: Հիմա իրականացվում են «ճանապարհային քարտեզում» նշված միջոցառումները: Հայաստանը շատ ակտիվորեն աշխատում է այդ ուղղությամբ: Ես նաև կուզենայի լսել ձեր դիրքորոշումը, տեսակետը ներկայիս դրությամբ, քանի որ բառացիորեն մի քանի օր հետո Մինսկում տեղի կունենա ՄՄ և ՄՏՏ անդամ 3 պետությունների ղեկավարների հանդիպումը, որպեսզի մենք իմանանք՝ ինչպես մեզ պահենք այդ առումով»,- Նալբանդյանին ասել է Լուկաշենկոն:
«Ինչ վերաբերում է մեր երկկողմ հարաբերություններին, ես ձեզ անկեղծ կասեմ՝ ես այդ հարաբերությունների զարգացման տեմպով, ի տարբերություն որոշ այլ երկրների, գոհ եմ: Մենք վիթխարի ապրանքաշրջանառություն չունենք, երևի չի էլ ստացվի այդքան հսկայական: Բայց հաշվի առնելով, որ մենք ընդհանրապես ոչինչ չունեինք՝ ապրանքաշրջանառությունը զրոյական էր, ապա այսօր սա մեծ առաջընթաց է: Եվ ես տեսնում եմ, թե ինչպես Հայաստանը, ելնելով իր հնարավորություններից, ձգտում է նաև բելառուսական ապրանքներ գնել: Մենք էլ Հայաստանում այսօր գնում ենք այն, ինչը մենք չենք արտադրում: Ձեր ներդրողներն ակտիվորեն աշխատում են այստեղ՝ Բելառուսի տարածքում»,- ավելացրել է Լուկաշենկոն: Նա նշել է, որ «Հայաստանը մեզ հմար օտար երկիր չէ»:
Իր հերթին, Նալբանդյանը նշել է, որ 2013-ին Հայաստանի և Բելառուսի միջև ապրանքաշրջանառությունը կազմել է մոտ 50 մլն դոլար, և տնտեսական ոլորտում երկկողմ համագործակցությունը զարգանում է: Նալբանդյանը նաև հայտնել է, որ պաշտոնական Երևանը կատարում է ՄՄ-ին միանալու իր ստանձնած պարտավորությունները, և «արդեն գործնականում կատարված է «ճանապարհային քարտեզը», այս մասին կզեկուցվի Մինսկում ապրիլի 29-ին կայանալիք գագաթնաժողովի ժամանակ:
