«Շախտյոր»-ի և Հայաստանի հավաքականի կիսապաշտպան Հենրիկ Մխիթարյանը «Մետալուրգ»-ի հետ կայանալիք դոնեցկյան դերբիից առաջ պատասխանել է ակումբի պաշտոնական կայքի հարցերին:
– Հենրիկ, «Շախտյոր» տեղափոխվելուց հետո շարունակո՞ւմ ես հետևել «Մետալուրգ»-ի խաղերին:
– Իհարկե հետևում եմ: Եվ ոչ միայն «Մետալուրգ»-ի խաղերին, փորձում եմ դիտել Ուկրաինայի առաջնությունում հանդես եկող բոլոր թիմերի մասնակցությամբ հանդիպումները, որովհետև մենք պետք է խաղանք նրանց հետ:
– Բայց «Մետալուրգ»-ի նկատմամբ հատուկ վերաբերմունք ունե՞ս:
– Իհարկե, կարելի ասել, որ հենց այնտեղ եմ ես սկսել իմ առաջին լուրջ քայլերն անել ֆուտբոլում:
– «Մետալուրգ»-ի մարզադաշտ այցելո՞ւմ ես:
– Այո՛, երբեմն լինում եմ այնտեղ, երբ ազատ ժամանակ եմ ունենում: Գնում եմ ու հետևում նախկին թիմիս խաղին. հետաքրքիր է կողքից դիտել նախկին խաղընկերներիս:
– Տղաներից ո՞ւմ հետ ես շարունակում շփվել:
– Շփվում եմ հայ ֆուտբոլիստների հետ, պորտուգալացիների և բոլոր մնացածների: Հանդիպելու ժամանակ չափազանց ջերմ ենք միմյանց նկատմամբ:
– Ի՞նչ զգացողություններով ես դուրս գալու խաղադաշտ: Որոշակի նոստալգիա մնացե՞լ է:
– Ո՛չ, քանի որ ես «Շախտյոր»-ի խաղացող եմ և իրավունք չունեմ դաշտ դուրս գալ ինչ-որ նոստալգիայով:
– Երբ վերջին խաղում գոլի հեղինակ դարձար, նկատեցի՞ր, որ «Դոնբաս Արենա»-ում յուրահատուկ երաժշտություն հնչեց:
– Այո-այո-այո (ժպտում է): Շատ լավ միտք է: Կաշխատեմ ամեն ինչ անել, որ ամեն անգամ գոլ խփեմ «Դոնբաս Արենա»-ում, որ լսեմ ինձ հարազատ երաժշտությունը (խոսքը «Սուսերով պար»-ի մասին է.- 1in.am):
– «Մետալուրգ»-ին առանց երաժշտության ու խղճմտանքի նույնպե՞ս կփորձես գոլեր խփել:
– Առաջին հերթին թիմը պետք է փորձի հաղթել, իսկ թե ովքեր կդառնան գոլերի հեղինակներ՝ արդեն կարևոր չէ:
