Միացյալ Նահանգներից լրագրող Քրիշնա Անդավոլուն Ուրուգվայի նախագահ Խոսե Մուխիկայի հետ հարցազրույցի ժամանակ մարիխուանա է ծխել: Ուրուգվայը վերջերս դարձավ աշխարհում առաջին երկիրը, որն օրինականացրել է մարիխուանայի արտադրությունը, վաճառքն ու օգտագործումը, հայտնում է Peru21 պարբերականը:
«Ես ծխում եմ Ուրուգվայի նախագահի հետ»,- ասել է Անդավոլուն՝ հաճույքով ծխելով թմրանյութը, ինչը նախագահի հեգնական ժպիտն է առաջացրել: Լրագրողը Մոնտեվիդեո է մեկնել մարիխուանայի օրինականացման մասին ռեպորտաժ պատրաստելու համար:
Տեսանյութն արդեն բուռն քննարկում է առաջացրել մամուլում և համացանցում: Անդավոլուն բացատրել է, որ ինքը թմրանյութը ծխել է հարցազրույցի վերջում, ընդ որում՝ նախապես դրա համար թույլտվություն է խնդրել Ուրուգվայի նախագահից: Լրագրողը նշել է, որ Ուրուգվայում մարիխուանայի օգտագործումը երիտասարդության հետ կապված մշակույթի մաս է:
Ուրուգվայն աշխարհում առաջին երկիրն է, որը 2013-ի վերջին օրինականացրել է մարիխուանայի արտադրությունն ու վաճառքը: Տեղի բնակիչներին թույլատրվում է մեկ անձի հաշվով թմրանյութի մինչև 6 թուփ աճեցնել: Նորմայի գերազանցումը պատժելի է 20 ամսից մինչև 10 տարվա ազատազրկմամբ:
