Եգիպտական «փողոցը» կրկին նշանակալի հաջողության է հասել Եգիպտոսի նախկին նախագահ Հոսնի Մուբարաքի վարչակազմից վերջնական ազատվելու գործում: Մոտ 700 բարձրաստիճան սպա, այդ թվում՝ 505 գեներալ, մինչև օգոստոս պաշտոնանկ կարվեն Եգիպտոսի ոստիկանությունից, որովհետև նրանք մասնակից են եղել հունվար-փետրվար ամիսներին խաղաղ ցուցարարներին ճնշելուն և գնդակահարելուն,- հաղորդում է BBC-ն:
Այս մասին նախօրեին հայտարարել է երկրի ներքին գործերի նախարար Մանսուր Իսաուին՝ փորձելով այս քայլով հանդարտեցնել ցուցարարներին, որոնք արդեն մի քանի օր է՝ լցվել են մայրաքաղաքի հրապարակներն ու փողոցները: Երեկ ցուցարարները պահանջել են զինվորական ժամանակավոր ղեկավարության հրաժարականը, քանի որ չեն ստանում իրենց հարցերի պատասխանները, իսկ գնդակահարությունների համար իրական մեղավորները՝ չեն պատժվում։
