ՀԱԿ վարչության անդամ, տնտեսագետ Վահագն Խաչատրյանը, այսօր ելույթ ունենալով ոչ իշխանական չորս ուժերի «Նոր տնտեսական քաղաքականություն» համաժողովի ընթացքում Եվրոպայի հայկական միությունների ֆորումին (ԵՀՄՖ), նշեց, որ ստեղծված իրավիճակը պահանջում է միայն և միայն մեկ լուծում՝ քաղաքական:
Նա ցավով նկատեց, որ տնտեսական բոլոր հնարավորությունները, ռեսուրսները սպառված են:
«Այն, որ ՀՀ-ն հայտնվել է խորը համակարգային քաղաքական, տնտեսական, սոցիալական, բարոյական ճգնաժամի մեջ, փաստ է: Հիվանդին՝ տվյալ դեպքում գոյություն ունեցող ավազակապետությանը, այլևս դեղամիջոցները չեն փրկի: Եկել է կտրուկ և անհետաձգելի վիրահատության ժամանակը, և դա պետք է արվի առանց հապաղելու, շտապ, որպեսզի հնարավոր լինի փրկել հիվանդին՝ կանխելով երկրի փլուզումը»,-ասաց Վահագն Խաչատրյանը:
Նա նշեց, որ այսօր արտագաղթի հիմնական պատճառը մի կտոր հացի գումար հայթայթելը չէ: Մասնագիտական ուսումնասիրությունները պարզել են, որ մեր հայրենակիցների՝ հայրենիքը լքելու հիմնական պատճառներից են հեռանկարի բացակայությունը, արժանապատիվ ապրելու ցանկությունը:
«Պետք է արձանագրել, որ գործող իշխանական համակարգը իր վերարտադրության և իշխանության պահպանման համար արատավորեց, արժեզրկեց ամբողջ պետական ինստիտուտները՝ դրանք ծառայեցնելով իր նպատակներին և անտեսելով պետությունը, ՀՀ քաղաքացիներին, հայ ժողովրդին»,-ասաց նա:
Մանրամասները՝ տեսանյութում:
