Եվրասիական տնտեսական միություն ստեղծելու ծրագրերն ուժի մեջ են, սակայն չկա որևէ խոսք դրանց Հայաստանի մասնակցության մասին: 2015-ի հունվարի 1-ից Եվրասիական միություն ստեղծելու վերաբերյալ մայիսին պայմանագիր կստորագրեն Ռուսաստանի, Բելառուսի և Ղազախստանի ղեկավարները: Այս մասին տեղեկացրել էր ՌԴ առաջին փոխվարչապետ Իգոր Շուվալովը: «Եվրասիական տնտեսական միությունը կկայանա: Երեք երկրների նախագահները լի են 2015-ի հունվարի 1-ից Եվրասիական միություն ստեղծելու վերաբերյալ մայիսին պայմանագիր ստորագրելու վճռականությամբ: Հույս ունեմ, որ այդ ծրագրերը կիրագործվեն»,- ասել էր Շուվալովը: Թեև միությունը ձևավորվելու է և ըստ էության գործելու 2015-ի հունվարից, նախնական փաստաթղթերը ստորագրվելու են մայիսին, իսկ մինչ այդ Հայաստանն իրականացնելու է ՄՄ անդամակցության ճանապարհային քարտեզը և մայիսին, ինչպես նախատեսում էին կողմերը, անդամակցելու ՄՄ-ին: Եվ ՀՀ, և ՌԴ իշխանությունները հայտարարել էին, որ ՀՀ-ն կդառնա Եվրասիական տնտեսական միության հիմնադիր անդամ, որը ներկայացվում էր որպես առավելություն:
Թե ինչո՞ւ չի նախատեսվում Հայաստանի մասնակցությունն այս թեկուզև նախնական գործընթացներին՝ հարցին՝ «Առաջին լրատվական»-ի հետ զրույցում պատասխանեց ԱՊՀ երկրների ինստիտուտի տնօրեն, ՌԴ Պետդումայի նախկին պատգամավոր Կոնստանտին Զատուլինը, պնդելով, որ սա միջանկյալ փուլ է, որին գուցե Հայաստանի մասնակցությունն անպայման չէ:
«Ես հույս ունեմ, որ քաղաքական խնդիրներ չկան, դրանք եղել են, եղել են կասկածներ, ապա դրանք հանգուցալուծվել են նախորդ փուլում, մեծ խնդիրներ այստեղ չեմ տեսնում իրականում, պետք է միայն հստակեցնել, թե նախապատրաստական աշխատանքներն ինչ փուլում են, սա կարող է միայն դրանով պայմանավորված լինել:
«Միջազգային եվրասիական շարժման» լիդեր, իր ազգայնական հայացքներով հայտնի ռուս քաղաքագետ, հայ-ռուսական «Գրիբոյեդով» ակումբի անդամ Ալեքսանդր Դուգինը մեզ հետ զրույցում ևս անդրադարձել էր այս հարցին, ասելով, եթե որոշ փաստաթղթեր դեռ չեն հասցրել պատրաստել մինչ մայիս, ապա դա հնարավոր չէր: Ըստ նրա՝ Եվրասիական միությունը որոշակիորեն խոր մակարդակի ինտեգրացիա է, ինտեգրացիա՝ օրենսդրության, տնտեսական, իրավական նորմերի և այս ամենը Եվրասիական չափանիշներին բերելու համար Ղազախստանն ու Բելառուսն աշխատել էին դեռևս վաղուց, իսկ Հայաստանը սրան է միացել շատ ավելի ուշ: «Իմ տեսանկյունից, չափազանց կարևոր է, որ Հայաստանը հիմնադիր անդամ դառնա: Իմ բացատրությունը միայն տեխնիկական խնդիրներն են՝ շատ հարցեր դեռ չեն համաձայնեցվել»,- ասաց նա:
Դեռևս դեկտեմբերի 2-ին Հայաստանում ՌԴ նախագահ Վլադիմիր Պուտինն էր բարձր գնահատել իր հայաստանյան գործընկերների ՄՄ անդամակցության ուղղությամբ ներդրած ջանքերը, նույնիսկ նշելով, որ իրենք չեն հասցնում իրենց գործընկերների հետևից: ՀՀ պաշտոնյաները ևս պնդում էին, որ մինչ մայիս անդամակցությունն այլևս իրողություն կլինի, քանի որ իրավական-հարկային-մաքսային բլոկի տարբեր օրենքների համապատասխանեցումն, այսինքն` ներդաշնակեցումը, ավարտին կհասցվի մինչև մայիս, որը ենթադրում է, որ մայիսին արդեն պաշտոնական Երևանն՝ արդեն ՄՄ անդամ, կկարողանար մասնակցել նաև Եվրասիական տնտեսական միության ձևավորման գործընթացին: Եթե ՌԴ առաջին փոխվարչապետ Շուվալովը չի հիշատակում Հայաստանի մասին, ապա կարելի է ենթադրել, որ Հայաստանը չի անդամակցի Մաքսային միությանը նախատեսվող ժամկետում, այդ պատճառով էլ չի կարող լինել Եվրասիական տնտեսական միության հիմնադիր անդամ մայիս ամսին:
