«Առաջին լրատվական»-ի դիվանագիտական աղբյուրները հայտնում են, որ Հայաստանում Ուկրաինայի դեսպան Իվան Կուխտան վաղը կմեկնի Կիև։ Ի դեպ՝ նա կմեկնի ոչ թե խորհրդակցությունների, ինչպես ավելի վաղ Ուկրաինայի ԱԳ նախարարի հետ չհամաձայնեցված տեղեկություն էր տարածել ԱԳ նախարարության ներկայացուցիչը, այլ գործուղման:
Թե որքան կտևի գործուղումը, հայտնի չէ, բայց այն, որ այդ ընթացքում կորոշվի ՀՀ-ում Ուկրաինայի դեսպանի հետագա աշխատանքի ճակատագիրը, հստակ է: «Առաջին լրատվական»-ը փորձեց լուրի իսկությունը պարզել ՀՀ-ում Ուկրաինայի դեսպանատնից, որտեղից մեզ տեղեկացրին, որ իրենք դեռևս նման տեղեկատվություն չունեն և ոչինչ ասել չեն կարող:
Հիշեցնենք, որ Պուտին-Սարգսյան հեռախոսազրույցի մասին մամլո հաղորդագրության տարածումից անմիջապես հետո Ուկրաինայի ԱԳՆ ներկայացուցիչը ԱԳ նախարարի հետ չհամաձայնեցված տեղեկություն էր տարածել այն մասին, որ Կիևը հետ է կանչում ՀՀ-ում Ուկրաինայի դեսպանին՝ խորհրդակցությունների և սպասում է Հայաստանի պետական դիրքորոշմանը Ղրիմի անեքսիայի հարցով:
Նույն օրը՝ մարտի 21-ին, ԱԳ նախարարի տեղակալ Շավարշ Քոչարյանն ընդունել էր Հայաստանում Ուկրաինայի դեսպան Իվան Կուխտային՝ վերջինիս խնդրանքով: Հանդիպման ընթացքում փոխարտգործնախարարը վերահաստատել էր, որ ինքնորոշման իրավունքի վերաբերյալ Հայաստանի սկզբունքային դիրքորոշումն անփոփոխ է և տարիների ընթացքում բազմիցս արտահայտվել է:
Արտգործնախարարի տեղակալը նշել էր, որ Հայաստանի և Ուկրաինայի բարեկամ ժողովուրդների դարավոր հարաբերությունները կազմում են այն ամուր հենքը, որի վրա կառուցվում է մեր երկու երկրների միջև փոխգործակցությունը:
Լուսանկարը՝ PAN Photo-ի
