Նախարար Համբարձում Մաթևոսյանը Լոնդոնում քառակողմ հանդիպում է ունեցել «Bezos Earth Fund»-ի բնապահպանական լուծումների ծրագրի ղեկավար և գործադիր տնօրեն Քրիստիան Սամպերի, Re:wild կազմակերպության նախագահ և գործադիր տնօրեն Ուես Սեկրեստի և ՄԱԿ-ի Կենսաբազմազանության մասին կոնվենցիայի գործադիր քարտուղար Աստրիդ Շոմաքերի հետ։ Հանդիպման ընթացքում քննարկվել են COP17-ի նախագահության առաջնահերթությունները՝ առանձնահատուկ ուշադրություն դարձնելով կենսաբազմազանության պահպանության համար ֆինանսական ռեսուրսների մոբիլիզացիային, մասնավոր և բարեգործական ներդրումների խթանմանը, ինչպես նաև Կունմինգ-Մոնրեալի կենսաբազմազանության գլոբալ շրջանակի նպատակների իրականացման ընթացքին։
Համբարձում Մաթևոսյանը ներկայացրել է Հայաստանի կողմից իրականացվող աշխատանքները՝ պահպանվող տարածքների ընդլայնման, կենսաբազմազանության պահպանության արդյունավետության բարձրացման և վտանգված տեսակների պահպանության ուղղությամբ։ Նախարարն անդրադարձ է կատարել նաև COP17-ի շրջանակում ձևավորվող առանցքային նախաձեռնություններին։ Նա ընդգծել է, որ կենսաբազմազանության պահպանության ֆինանսավորման բացը հնարավոր չէ հաղթահարել միայն պետական միջոցներով․ անհրաժեշտ է համատեղել կառավարությունների, միջազգային կազմակերպությունների, մասնավոր հատվածի և բարեգործական հիմնադրամների ջանքերը։ COP17-ը կարևոր հնարավորություն է՝ ապացուցելու, որ հավակնոտ նպատակներն ու հաշվետվողականությունը կարող են համատեղվել կենսաբազմազանության գլոբալ կառավարման շրջանակում։ Հայաստանը պատրաստ է իր նախագահության ընթացքում նպաստել այդ օրակարգի առաջմղմանը՝ համագործակցելով բոլոր շահագրգիռ գործընկերների հետ։
