Հայ-ամերիկյան առողջության կենտրոնի վիրաբուժական գինեկոլոգիայի բաժնի վարիչ Վահե Տեր-Մինասյանը հեռուստատեսությամբ «Գարդասիլ» պատվաստանյութի վերաբերյալ հարցազրույց տալու համար ենթարկվել էր 250 հազար դրամ վարչական տույժի։ Այս հարցը բարձրացվել է անգամ Ազգային ժողովում կառավարության հետ հարցուպատասխանի ժամանակ։
Այստեղ ո՞րն է խնդիրը՝ խախտե՞լ եք օրենքը, թե՞ ոչ «Առաջին լրատվական»-ի հարցին բժիշկ Վահե Տեր-Մինասյանը պատասխանեց․ «Փորձեմ բացատրել՝ իրականում ինչ է տեղի ունեցել։ Այդ չարաբաստիկ օրը երկու զուգահեռ մամլո ասուլիսներ են տեղ ունենում։ Մեկը կազմակերպում է ՀՀ առողջապահության նախարարությունը՝ իր մասնագետներով, և ներկայացնում է, որ առաջարկվող պատվաստանյութը ինչքան լավ բան է և ինչքան կյանքեր կարող է փրկել։ Այսինքն՝ տարածում է համապատասխան ինֆորմացիա։ Նույն ժամին մի խումբ, այսպես ասած, ակտիվիստներ, որոնք դեմ են պատվաստանյութին, տալիս են երկրորդ ասուլիսը։ Այսինքն՝ ասում են, որ հանկարծ ձեր երեխաներին չտանեք, չպատվաստեք, դուք ինքներդ չգնաք ու չպատվաստվեք։ Էդ պարագայում «Շանթ» հեռուստաընկերության «Հեռանկար» հաղորդումը ոչ որպես այդ հեռուստաընկերության աշխատակից, այլ որպես ուռուցքաբան, որն ամբողջ կյանքում զբաղվում է գինեկոլոգիական ուռուցքների բուժմամբ, ինձ, որպես նեղ մասնագետի, հրավիրում են հարցազրույցի, որ հասկանանք՝ վերջիվերջո, էս մարդիկ են ճիշտ, թե էս մարդիկ են ճիշտ։ Սա ո՛չ բժշկական հաղորդում է, ո՛չ կոմերցիոն հաղորդում է, ոչ ոք դրա համար գումար չի ստանում, էդ պատվաստանյութը ոչ ոք չի կարող գնալ ու գնել որևէ տեղից։ Այսինքն՝ մենք գնում ենք հանրային մի քննարկման, որպեսզի մարդիկ իրազեկվեն․ վերջիվերջո, մարդիկ ո՞ւմ հավատան, ո՞վ է ճիշտ։ Պետությունն ասում է՝ մենք ձեզ առաջարկում ենք, մարդիկ էլ ուզում են իմանալ՝ էդ առաջարկից օգտվե՞ն, թե՞ ոչ»։
«Ավելին ասեմ՝ առողջապահության նախարարի հրամանով ես նշանակվել էի որպես բանախոս, այսինքն՝ պետության կողմից տրված հնարավորությունով ես մարդկանց պետք է բացատրեմ ոչ թե էմոցիոնալ ֆոնի վրա, այլ գիտական, ապացուցողական, զուտ բժշկական տեսանկյունից։ Եվ հանկարծ, առանց հաշվի առնելու նախորդ բոլոր տասնյակ, եթե ոչ հարյուրավոր հարցազրույցները, որոշում են, որ ա՛յ, այդ մի հարցազրույցը ամենածանրն են տարել մարդիկ։ Ասում են՝ ա՛յ, դուք տեղեկատվություն եք տարածել, և մենք ձեզ տուգանում ենք»,- հավելեց Վահե Տեր-Մինասյանը։
Բանախոսը նաև ասաց, որ կշեռքի նժարին դրված է տարեկան 150 կնոջ կյանք ու ինչ-որ չինովնիկի ամբիցիա։
Մանրամասները՝ տեսանյութում։