Ռուսաստանի հայերի միությունը, ի դեմս միության նախագահ Արա Աբրահամյանի, պետք է զերծ մնա Ղրիմի հարցով ընդգծված ռուսամետ դիրքորոշում արտահայտելուց՝ հաշվի առնելով, որ այնտեղ մեծ թվով հայեր են բնակվում: «Առաջին լրատվական»-ի հետ զրույցում այս մասին ասաց քաղաքագետ Գագիկ Համբարյանը:
«Այդ կառույցը Կրեմլի կողմից ստեղծված պուտինյան նախագիծ է: Եթե Պուտինը որևէ անհեթեթություն հայտարարի, Արա Աբրահամյանը՝ իր մերձավոր շրջապատով կողմ կլինի դրան: Մինչդեռ Ղրիմի հարցում մենք պետք է շատ զգույշ լինենք, որովհետև հայեր բնակվում են ոչ միայն այնտեղ, այլև ամբողջ Ուկրաինայում: Մենք պետք է հաշվի առնենք ոչ միայն Ռուսաստանի դիրքերը, այլ այն, որ Ուկրաինայի ողջ տարածքում մեծաթիվ հայեր են բնակվում: Կիևում պաշտոնական տվյալներով մինչև 50 հազար, ոչ պաշտոնական տվյալներով՝ 70 հազար հայ է ապրում: Հայկական մեծ համայնքներ կան ինչպես Դոնեցկում, Լուգանսկում, այնպես էլ Օդեսայում, Դնեպրոպետրովսկում: Այնպես որ, մենք պետք է շատ զգույշ լինենք՝ չհայտնվելու այն վիճակում, որում հայտնվեցինք վրաց-աբխազական հակամարտության ժամանակ»,- ասաց քաղաքագետը:
Գագիկ Համբարյանի խոսքով՝ Ղրիմի խնդրի շուրջ ռուսաստանահայերը պետք է սահմանափակվեն գոնե միայն «Ղրիմին սատարելուն» նվիրված համառուսաստանյան քաղաքացիական ակցիային մեկ անգամ մասնակցելով: «Ուկրաինայի նորաթուխ իշխանությունները շատ լավ կհասկանան, որ հայերի մասնակցությունը վերոնշյալ ակցիային, ինչպես նաև Արա Աբրահամյանի կարծիքը ընդամենը պուտինյան նախագիծ հանդիսացող միության կարծիք է, չի համապատասխանում ՀՀ արտաքին շահերին և չի արտահայտում հայկական կողմի պաշտոնական կարծիքը»,- ասաց քաղաքագետը:
Ամփոփելով՝ քաղաքագետը նկատեց, որ Ղրիմի և ԼՂՀ խնդիրները խիստ նման են միմյանց: «Պատմական ճշմարտությամբ և բարոյական նորմերով՝ Ղրիմի՝ Ուկրաինայի կազմում լինելն ի սկզբանե սխալ է եղել»,- ասաց նա:
Ռազմավարական և ազգային հետազոտությունների հայկական կենտրոնի փորձագետ Սարո Սարոյանն էլ «Առաջին լրատվական»-ի հետ զրույցում նշեց, որ ուկրաինական խնդրի նման թեժ խնդիրների ժամանակ Ռուսաստանի հայերի միությունը պետք է զերծ մնա ռադիկալ քայլերից: «Բայց մենք բոլորս գիտենք՝ ինչ է իրենից ներկայացնում Ռուսաստանը: Անգամ այդ երկրի ուկրաինական համայնքը կարող է Ղրիմի հարցում ռուսամետ դիրքորոշում արտահայտել, այնպես որ՝ ոչ մենք, ոչ էլ աշխարհը չպետք է զարմանա սրանից: Ռուսաստանին շատ բնորոշ քայլ է արվել: Բոլորին է հայտնի, որ Մոսկվայում ռուսական «սապոգի» կրնկի տակից փախչելը գրեթե անհնար է: Ամբողջ աշխարհը գիտի, թե ի դեմս Ռուսաստանի՝ ում հետ գործ ունի: Այստեղից հետևություն՝ ոչ ոքի համար չպետք է զարմանալի թվա Ռուսաստանի հայերի նման պահվածքը»,- ասաց փորձագետը՝ հավելելով, որ հայտնած կարծիքի արժեքը կայանում է ազատության մեջ, մինչդեռ ռուսաստանահայերի հայտնած դիրքորոշումը «կամավոր-պարտադիր» է:
Հիշեցնենք, որ Ռուսաստանի հայերի միությունը՝ Արա Աբրահամյանի գլխավորությամբ, ակտիվ մասնակցություն է ունեցել համառուսաստանյան քաղաքացիական ակցիային. ակցիան նվիրված էր «Ղրիմին սատարելուն»:
