Այս պահին Երևանից Օհանավան մեկնեցին մի խումբ բնապահպաններ, քաղաքացիական ակտիվիստներ՝ իրենց զորակցությունը հայտնելու բնակիչներին, ովքեր դեմ են ՀԷԿ-ի կառուցմանը:
«Առաջին լրատվական»-ի հետ զրույցում բնապահպան ակտիվիստ Եղիա Ներսիսյանը նշեց, որ անթույլատրելի է ցանկացած ՀԷԿ-ի կառուցում: Որևէ փոխզիջում չի կարող լինել կառավարության և բնակիչների միջև. պահանջը մեկն է՝ ՀԷԿ չի կառուցվելու:
Նա վստահություն հայտնեց, որ այդ պայքարում հաղթելու են, քանի որ 8 գյուղերից չեք գտնի մեկ գյուղացի, ով կողմ լինի ՀԷԿ-ի կառուցմանը:
Բնակիչներից մեկն էլ նշեց, որ իրենք դեմ են յուրաքանչյուր փոխզիջման, քանի որ ամեն օր հեռուստացույցով տեսնում են հարյուրավոր խաբված բնակիչների, ում տներից հանել են և այդպես էլ տուն չեն տվել:
Բնակիչները սպասում են կառավարության ներկայացուցիչների ժամանմանը:
