Հրապարակվել է ՀՀ հակակոռուպցիոն ռազմավարությունը և դրա իրականացման 2019-2022թթ. միջոցառումների ծրագիրը հաստատելու մասին ՀՀ կառավարության որոշման նախագծի լրամշակված տարբերակը: Թեմայի շուրջ զրուցելու համար «Առաջին լրատվական»-ը հյուրընկալել է արդարադատության նախարարի տեղակալ Տիգրան Խաչիկյանին, ԱԺ «Լուսավոր Հայաստան» խմբակցության պատգամավոր Անի Սամսոնյանին և «Իրավաբանների հայկական ասոցիացիայի» հակակոռուպցիոն փորձագետ, իրավաբան Սյուզաննա Սողոմոնյանին:
«Հակակոռուպցիոն ռազմավարության սկզբնական նախագիծն ուներ թե՛ հայեցակարգային, թե՛ բովանդակային բազմաթիվ թերություններ, որոնցից յուրաքանչյուրը մենք ընթացքում դարձրել ենք առանձին քննարկման առարկա»,- նշեց արդարադատության փոխնախարարը՝ հավելելով, որ իրենք նախատեսել են բազմաթիվ առաջադիմական միջոցառումներ, որոնք կոչված են կառավարության ծրագրի հասցեավորված կիրառմանը կոռուպցիայի դեմ պայքարն ավելի հետևողական և արմատական առաջ տանելու համար:
Ինչպես նշեց Անի Սամսոնյանը՝ այս փաստաթղթով առաջարկվում է կոռուպցիայի դեմ պայքարը դնել ինստիտուցիոնալ հենքի վրա. «Ըստ այդմ՝ առաջարկվում է ստեղծել հակակոռուպցիոն կոմիտե, սակայն հստակ չէր՝ այդ կոմիտեն ունիվերսա՞լ է, թե՞ ոչ: Այսինքն՝ մենք այդտեղ Քննչական կոմիտեից, ոստիկանությունից և ՊԵԿ-ից վերցնում ենք որոշակի հաստիքներ, գործիքակազմը տեղափոխելու ենք հակակոռուպցիոն կոմիտե, բայց այդտեղ բաց են մնում կանխարգելման, կրթական գործիքակազմերը»:
Պատգամավորի խոսքով՝ ակնհայտ է, որ այդ տարանջատման մոդելը չի գործել. «Բազմիցս շեշտվել է, որ կոռուպցիայի հաղթահարման համար խոչընդոտ է հանդիսացել այն, որ այդ գործառույթները բաշխված են մի քանի մարմինների վրա: Այն չի եղել համակարգված, միասնական, այդ իսկ պատճառով մեր խմբակցությունը հանդես եկավ այդ ինստիտուցիոնալ, ունիվերսալ հակակոռուպցիոն մարմինը ստեղծելու առաջարկով»:
Տիգրան Խաչիկյանը, սակայն, հակադարձեց՝ ասելով. «Ինստիտուցիոնալ համակարգը ներդրվել է հենց այս մոդելի շրջանակներում: Մենք միասնականացնում ենք նախաքննության իրականացման գործառույթը, այսինքն՝ կոռուպցիոն հանցագործությունները պետք է քննության առարկա դառնան մեկ միասնական մարմնի կողմից»:
Անի Սամսոնյանն էլ, ի պատասխան փոխնախարարի «հարձակման», նշեց. «Ձեզ մոտ միացված է ինքնարդարացման մի կոճակ: Դուք աշխատելու խնդիր ունեք»:
Ինչպես նշեց Սյուզաննա Սողոմոնյանը՝ նախատեսվում է ստեղծել հակակոռուպցիոն քաղաքականության նոր մարմին, որը ենթադրաբար պետք է փոխարինի գործող խորհրդին. «Եվ բնականաբար բոլորիս մեջ հարց է ծագում՝ եթե նոր մարմին է ստեղծվում, այն պետք է էականորեն տարբերվի գործող մարմնից: Սակայն որևէ կոնցեպտուալ փոփոխություն չկա, ավելին՝ այն համարվում է ռեգրես»:
Հարցազրույցն ամբողջությամբ՝ տեսանյութում: