Ժամեր անց Վազգեն Սարգսյանի անվան «Հանրապետական» մարզադաշտում տեղի կունենա 2020 թվականի Եվրոպայի առաջնության ընտրական փուլի Հայաստան-Լիխտենշտեյն մրցավեճը: Դեռևս անցյալ տարի Հայաստանի հավաքականի գլխավոր մարզիչ Արմեն Գյուլբուդաղյանցը երևանյան մրցավեճերից մեկը որակել էր ազգի պատվի հանդիպում: Ցավով պետք է նշենք, որ վերջին տարիներին Հայաստանի ազգային հավաքականը վերածվել է ֆուտբոլիստների մի խմբի, որոնք խաղում են երկրի արժանապատվության հետ: Այսօր սակայն դառը հիշողությունները վերհիշելու պահը չէ: «Մենք Ձեր աջակցության կարիքը շատ ունենք»,- դիմելով երկրպագուներին շարունակ ասում են մեր հավաքականի ֆուտբոլիստները: Նմանատիպ կոչեր և խնդրանքներ բազմիցս ենք լսել:
Այսօր սակայն իրավիճակն այլ է: Ֆուտբոլիստն իսկապես ունի երկրպագուի աջակցության կարիքը: Այսօր խաղադաշտ դուրս եկած յուրաքանչյուր ֆուտբոլիստ պարտավոր է ապացուցել, որ ոչ միայն Հայաստանում, այլ հայկական ֆուտբոլում իսկապես իրավիճակ է փոխվել: Պետք է ապացուցել, որ նախորդ հանդիպումներում տեղի ունեցած խայտառակությունների գլխավոր պատճառներից է եղել տարիներ շարունակ հաստատված գաղջ մթնոլորտը: Ազգային հավաքականի մարզաշապիկը կրող ֆուտբոլիստը պետք է գիտակցի, որը խաղից հետո հաշվետու է երկրպագուին: Սա ամենևին չի նշանակում, որ յուրաքանչյուր խաղում մեր հավաքականը պարտավոր է հաղթել: Պարզապես պետք է խաղալ այնպես, որ սեփական խղճի առաջ մաքուր լինելով, պարզ ճակատով մոտենալ տրիբունաներին և շնորհակալություն հայտնել աջակցության համար: Ցավոք եղել են նախադեպեր, երբ մեր ֆուտբոլիստները «գլուխները կախ» շտապել են դեպի ավտոբուսը: Ինչևէ, եղածը եղած է և հիմա ժամանակը չէ խոսելու նեգատիվ երևույթների մասին, որոնք անցյալում են: Վերջին շրջանում շատ է խոսվում գլխավոր մարզչի մասին:
Այո, մենք կարծում ենք, որ Արմեն Գյուլբուդաղյանցի աշխատանքը չի ստացվում ազգային հավաքականում: Բայց մենք յուրաքանչյուր խաղում պարտավոր ենք լինել Գյուլբուդաղյանցի և բոլոր ֆուտբոլիստների կողքին: 2007 թվականին Հայաստանի հավաքականը ֆանտաստիկ հանդիպումներ անցկացրեց Լեհաստանի և Պորտուգալիայի հավաքականների հետ: Մեր ֆուտբոլիստները խաղադաշտում ներդրեցին ողջ ներուժը և կարելի է ասել գլխից վեր ցատկեցին: Այդ հանդիպումներում խաղադաշտ դուրս եկած ֆուտբոլիստների ենթագիտակցության մեջ լուսահոգի մարզիչ Յան Պորտերֆիլդն էր, որը տառապում էր քաղցկեղով, սակայն ծանր վիճակում, մահվան շեմին կանգնած էր Հայաստանի հավաքականի կողքին:
Այսօր այն բացառիկ դեպքերից է, երբ անցյալում տեղի ունեցածի վրա աչք փակելով՝ հասարակությունը կանգնած է ազգային հավաքականի կողքին: Հասարակություն, որը իրականացեց Թավշյա հեղափոխություն աշխարհին ապացուցելով, որ պետական գիտակցություն ունեցող հզոր մի ուժ է: Այսօր մեր ֆուտբոլիստներն ունեն հնարավորություն ապացուցելու, որ լուսավոր հասարակության մի մասնիկն են: Քննությունը պատշաճ կերպով հանձնելու համար կան բոլոր նախադրյալները: Քննություն, որը ձախողելը արդեն չի ընկալվի և ընդունվի հասարակության կողմից: Այո, կան խնդիրներ, որոնք հիմնականում կադրային են: Նման խնդիրներ լինելու են միշտ:
Այսօր մեր խնդիրն է, ոչ թե խնդիրների մասին հիշատակելը, այլ խնդիրները հաղթահարելով արդյունքի հասնելը:
