«Հրապարակ» օրաթերթը գրում է. «Ժառանգությունը» մասնակցելո՞ւ է Ծառուկյանի մոտ կայացող հանդիպումներին, հրավերն ստացե՞լ եք, եթե այո, ե՞րբ է այն տեղի ունենալու` հարցրինք ԱԺ «Ժառանգության» ֆրակցիայի ղեկավար Ռուբեն Հակոբյանին: «Մենք, այո, հանդիպելու ենք, այս պահին քննարկվում է «երբ»-ի և «որտեղ»-ի խնդիրը»: Ձեզ համար էակա՞ն է որտեղ, չե՞ք ուզում գնալ «կանյաչնի»: «Չեմ կարծում, թե դա այդքան էական է»:
Րաֆֆի Հովհաննիսյանը մասնակցելո՞ւ է հանդիպմանը: «Մենք քննարկում ենք նաև հանդիպման ձևաչափը»: Էն անգամ` նախագահական ընտրություններին, Րաֆֆի Հովհաննիսյանը Ծառուկյանին հրավիրեց, դուք ելաք-գնացիք «կանյաչնի»: Փաստորեն, դուք եք գնում, Ծառուկյանը չի գալիս:
«Որևէ լուրջ բան չեմ տեսնում այդտեղ, զուտ տեխնիկական պահ է»: Կարծում եք կկոնսոլիդացվե՞ք իրենց հետ: «Կարծում եմ»: Իսկ կարո՞ղ է հանդիպման ժամանակ լինեն հարցեր, որոնք ձեր կամ Իվանիշվիլի-Ծառուկյանի համար անընդունելի կլինեն. իրենք, օրինակ, չեն ուզում լսել Սերժ Սարգսյանի հրաժարականի մասին:
«Նման հարցերից կարելի է խոսել միայն հանդիպումից հետո»: Այսինքն` հանդիպմանը դուք անպայման բարձրացնելո՞ւ եք Սերժ Սարգսյանի հրաժարականի խնդիրը: «Մենք կբարձրացնենք այն հարցերը, որոնք անհրաժեշտ կհամարենք»:
Լուսանկարը` PanARMENIAN Photo-ի
