Մանաուսի բանտերում (Ամազոնաս նահանգ) մայիսի 26-27-ին սպանվածների թիվը հասել է 57-ի, հաղորդում է BBC-ն:
Զոհվածների մեծ մասը (42 մարդ) խեղդամահ են արվել իրենց բանտախցերում: Նախնական տվյալներով, զանգվածային սպանությունները տեղի են ունեցել «Առաջին մայրաքաղաքային թիմ» և «Հյուսիսի ընտանիք» հանցավոր խմբավորումների միջև հակամարտության հետևանքով: Հյուսիսցիները համարում են, որ Ամազոնիան իրենց ազդեցության ոլորտն է և փորձում են արգելել Սան Պաուլոյում հիմնված ԱՄՔ-ի մուտքն այնտեղ:
Զանգվածային սպանությունները տեղի են ունեցել հարազատների այցելության ժամանակ, ինչով խախտվել է չգրված բանտային կանոնը՝ «չսպանել ծնողների ներկայությամբ»: Այս դեպքում, սպանությունների մի մասը կատարվել է կանանց, հայրերի և մայրերի աչքի առաջ:
Սպանվածների 20%-ը (11 հոգի) ընդհանրապես դատապարտյալ չեն եղել, այլ դատից առաջ գտնվել են կալանքի տակ (Բրազիլիայում արդարացնող դատավճիռների տոկոսը մոտ 40% է):
Հայտնի դատավոր և բանտարկյալների իրավունքների պաշտպան Լուիս Կառլոս Վալուան նշել է, որ մարիխուանայի օրինականացումը կփրկեր կալանավորված անձի կյանքը, որը բանտում էր հայտնվել մի քանի չափաբաժին մարիխուանայի համար և դեռ չէր հասցրել կանգնել դատարանի առաջ:
Ամազոնաս նահանգի նահանգապետը հայտարարել է, որ «սպանդը գործնականում անհնար էր կանխել»:
Բրազիլիայի նախագահ Ջաիր Բոլսոնարուն հայտարարել է, որ «անհանգստացած է» Մանաուսի բանտերում տեղի ունեցած նոր կոտորածի պատճառով:
