Ուկրաինան և նրա շուրջ ծավալվող իրադարձությունները լակմուսի ազդեցություն ունեցան և ի հայտ բերեցին թե՛ միջազգային իրավունքի, թե՛ երկրների ինքնիշխանության խնդիրները: Այսօր տեղի ունեցած քննարկման ժամանակ նման տեսակետ հայտնեց «Ժառանգություն» կուսակցության անդամ Ստյոպա Սաֆարյանը:
«Կառանձնացնեմ 4 մարտահրավեր: Առաջինը, ըստ էության, այն է, որ Ռուսաստանը ձեռնոց է նետել Ուկրաինայի ինքնիշխանությանը: Այս առումով ուղղակի տեսանելի է, որ Պուտինի կառավարելի ժողովրդավարությունների կոնցեպցիան խորը ճգնաժամ է ապրում: Յանուկովիչի անկանխատեսելիությունը, նրա դեգերումներն Արևմուտքի և Կրեմլի միջև ցույց տվեցին, որ այդ կոնցեպցիան տապալված է ուկրաինացի ժողովրդի և միջազգային հանրության ջանքերով:
Երկրորդ՝ Ռուսաստանը ձեռնոց է նետել նաև միջազգային իրավունքին: Ուղղակիորեն տեղի է ունենում ռազմական ագրեսիա հարևան երկրի տարածքում»,- ասաց նա՝ հավելելով, այտեղի են այն զուգահեռները, թե կատարվողը ռուսական արտաքին քաղաքականության հերթական փոփոխությունն է:
«Անհեթեթություն են նաև ԼՂՀ հետ տարվող զուգահեռները: Պարզապես կորցնելով ռեժիմի վրա իր ազդեցությունը, տապալված տեսնելով իր կոնցեպցիան՝ Ռուսաստանը ձգտում է ազդել Կիևի վրա:
Երրոդ ձեռնոցը Ռուսաստանը նետել է միջազգային հանրությանը, որը Բուդապեշտյան հուշագրով Ուկրաինայի տարածքային ամբողջականության երաշխավոր է հանդիսանում»,- ասաց Ստյոպա Սաֆարյանը:
Ժառանգական գործչի խոսքով՝ չորրորդ ձեռնոցը նետվել է հետխորհրդային հանրապետություններին՝ «Կուժ ասեմ, կուլա լսի» տարբերակով:
«Ուկրաինայի օրինակով Ռուսաստանը փորձում է սարսափեցնել բոլոր նրանց, ովքեր կփորձեն դուրս գալ իր ազդեցության ուղեծրից: Սակայն ակնհայտ է, որ եվրասիական միության կոնցեպցիան անդառնալիորեն ձախողված է: Որքան էլ ՌԴ-ն փորձում է գրավչության պատրանք ստեղծել, հետխորհրդային բոլոր երկրներն էլ տեսնում են, որ Ռուսաստանը ռազմավարական գործընկեր չէ, այլ ռազմավարական պատրոն՝ տիրակալ»,- ասաց Սաֆարյանը:
Նա համոզմունք հայտնեց, որ Ռուսաստանն իր գործողություններով Ուկրաինային մղում է դեպի ՆԱՏՕ՝ արագացնելով վերջինիս անդամակցության գործընթացը: «Կարծում եմ, որ Շոտլանդիայում կայանալիք գագաթնաժողովին Ուկրաինային ՆԱՏՕ-ի անդամակցության լուրջ հեռանկարներ կառաջարկվեն: Արևմուտքը մտածում է, որ Ռուսաստանն այլևս չի կարող առանցքային դերակատարում ունենալ գլոբալ հարցերում: Դրա մասին է խոսում նրան միջազգային կառույցներից դուրս հանելու միտումը: Այս է պատճառը, որ Հայաստանը պետք է ձգտի հարաբերությունների դիվերսիֆիկացման՝ մեղմելու Ռուսաստանից կախվածությունը»,- ասաց Ստյոպա Սաֆարյանը:
