Այս գիշեր կայացան Ամերիկայի գավաթի խաղարկության C խմբի մեկնարկային հանդիպումները: Սկզբում խաղադաշտ մտան Ուրուգվայի և Պերուի հավաքականները: Հանդիպումից առաջ այս զույգի բացահայտ ֆավորտն ուրուգվայցիներն էին և հենց նրանց գրոհների ներքո էլ մեկնարկեց այն: Առաջին խաղակեսի միջնամասում պերուացիներն ամբողջությամբ հավասարեցրին խաղն ու անգամ տիրեցին նախաձեռնությանը, իսկ 24-րդ րոպեին Գուերերոն առաջ մղեց իր թիմին: Տաբարսի սաներն ի վերջո կարողացան հավաքվել և խաղակեսի վերջնամասում երկու շատ վտանգավոր գրոհ կազմակերպեցին, որոնցից մեկի արդյունքում Լուիս Սուարեսը հավասարեցրեց հանդիպման հաշիվը:
Երկրորդ խաղակեսում շատ ավելի լավ տպավորություն թողեցին Սերխիո Մարգարյանի սաները, չնայած՝ նրանք ավելի քիչ էին տիրում գնդակին, ավելի շատ վտանգավոր պահեր առաջանում էին հենց Ուրուգվայի հավաքականի դարպասի մոտ: Պերուացիների գրոհներն առավել վտանգավոր դարձան, երբ Մարգարյանը խաղադաշտ մտցրեց Վարգասին: Խաղավարտն անցավ Պերուի հավաքականի թելադրանքով և վերջում ուրուգվայցիները հրաշքով փրկվեցին պարտությունից. Վարգասի փոխանցումից հետո Գուերերոն պարտավոր էր դուբլի հեղինակ դառնալ: Ինչևէ, նոր գոլեր չգրանցվեցին: Ուրուգվայ-Պերու՝ 1:1: Փաստորեն այս մրցաշարի 3 ֆավորիտներն էլ ոչ-ոքիներով սկսեցին իրենց հանդիպումները: Եթե Արգենտինայի ու Բրազիլիայի ընտրանիները մեծ առավելություն ունեին իրենց մրցակիցների նկատմամբ և կատարյալ անհաջողություն համարեցին իրենց ոչ-ոքիները, ապա Ուրուգվայի հավաքականը պետք է գոհ լինի արդյունքից:
Մյուս խաղում Չիլիացիները հաղթեցին Մեքսիկայի երիտասարդ հավաքականին ու գլխավորեցին C խումբը: Չիլիացիներն առաջինը գնդակ ընդունեցին սեփական դարպասը, սակայն կարմիրների առավելությունն այնքան մեծ էր, որ կասկած անգամ չկար, որ ուշ թե շուտ նրանց կհաջողի խփել այնքան գոլ, որքան անհրաժեշտ է հաղթանակի համար: Այդպես էլ եղավ: Առաջին խաղակեսի վերջնամասում Արաուխոյի խփած գոլին պատասխանեցին Պարադեսն (67 ր.) ու Վիդալը (73 ր.): մինչև խաղավարտ չիլիացիները կարող էին հաշիվը դարձնել խոշոր սակայն այն մնաց անփոփոխ: Չիլի-Մեքսիկա՝ 2:1: