Լիբանանի նախագահ Ժոզեֆ Աունը հայտարարություն է տարածել ԱՄՆ-ի և Իրանի միջև համաձայնության հաստատման վերաբերյալ՝ հույս հայտնելով, որ Մերձավոր Արևելքում պատերազմը դադարեցնելու վերաբերյալ ձեռք բերված համաձայնությունը «վերջնականապես կավարտի» Իսրայելի և «Հեզբոլլահ»-ի միջև հակամարտությունը։
«Բարձր եմ գնահատում հուշագրում արտահայտված՝ Լիբանանի ինքնիշխանության նկատմամբ հարգանքը և այն ընկալումը, որ Լիբանանի կայունությունն ու անվտանգությունը տարածաշրջանային կայունության ամրապնդման ցանկացած լուրջ ջանքի անբաժանելի մասն են՝ հաշվի առնելով վերջին փուլում լիբանանցիների կրած զրկանքները»,- ասվում է նախագահի հայտարարության մեջ։
Նա նշել է, որ Լիբանանի ժողովուրդը, հատկապես այն տարածքներում, որոնք շատ են տուժել հարձակումներից, այժմ սպասում է ձեռք բերված համաձայնության կյանքի կոչմմանը։
Նախագահը նաև երախտագիտություն է հայտնել բոլոր այն երկրներին և կազմակերպություններին, որոնք նպաստել են համաձայնության հաստատմանը, ինչպես նաև «բոլոր նրանց, ովքեր աշխատել են Լիբանանին ներառելու էսկալացիայի դադարեցման և ռազմական գործողությունների ավարտի ջանքերում՝ հաշվի առնելով վերջին ամիսներին լիբանանցիների կրած տառապանքի չափը»։
«Լիբանանը հույս ունի, որ այս զարգացումը կդառնա ավելի լայն գործընթացի սկիզբ, որը կուժեղացնի տարածաշրջանային կայունությունը, կպահպանի պետությունների ինքնիշխանությունն ու ժողովուրդների իրավունքները և թույլ կտա լիբանանցիներին կենտրոնանալ վերականգնման և բնականոն կյանքի վերականգնման վրա՝ անվտանգ և կայուն պետության ներքո»,- եզրափակել է նախագահը։
